Sapar barysynda energetıkalyq ınfraqurylymdy jańǵyrtý máselesine erekshe nazar aýdaryldy. Stepnogorsk qalasynda delegasııa jylý elektr ortalyǵynda bolyp, aldaǵy jylytý maýsymyna daıyndyq jumysymen tanysty. Kásiporynda negizgi jabdyqtardyń tozý deńgeıin 57%-ǵa deıin tómendetýge baǵyttalǵan jumys júrgizilip jatyr. Jylý jelileriniń tozý deńgeıi de 59%-ǵa deıin azaıtylǵan.
«Stepnogorsk Energokompleks» JShS bas dırektory Maqsat Ysqaqovtyń aıtýynsha, energııamen jabdyqtaý turaqtylyǵyn arttyrý maqsatynda qazandyq agregattaryna, týrbınalarǵa, kúl qubyry men tútin murjasyna kúrdeli jáne aǵymdaǵy jóndeý jumysy qarastyrylǵan. Bul sharalar jabdyqtardyń úzdiksiz jumysyn qamtamasyz etip, paıdalaný senimdiligi men qaýipsizdigin arttyrýǵa, sondaı-aq apatty jaǵdaılardyń aldyn alýǵa múmkindik beredi.
Sondaı-aq Nurlybek Nálibaev «Stepnogorsk taý-ken-hımııa kombınaty» JShS-da boldy. Onda ýran óńdeý keshenin jańǵyrtý nátıjesinde óndiristik qýattylyq jylyna 4 myń tonnadan 6 myń tonnaǵa deıin artyp jatyr. Kásiporynda óndiristiń úzdiksiz jumysyn qamtamasyz etý men odan ári damytý, kadrlar daıarlaý máseleleri qarastyryldy. О́ndiristi keńeıtý perspektıvalary «Stepnogorsk podshıpnık zaýyty» AQ-da da talqylandy.
Jumys sapary barysynda Premer-mınıstrdiń birinshi orynbasary «Qazaqstannyń Jylyjaı Tehnologııalary» JShS-da boldy. Kásiporyn jyl saıyn Kókshetaý, Astana, Petropavl qalalaryna shamamen 2,4 myń tonna kókónis pen kókshóp ónimderin jetkizedi.
Kókshetaý qalasyna sapar Savory zaýytynan bastaldy. Kásiporyn eýropalyq jabdyqtarmen ári avtomattandyrylǵan basqarý júıesimen jabdyqtalǵan. Munda quramajem óndirilip, ónimderi elimizdiń óńirlerine jáne О́zbekstanǵa jóneltiledi.
Nurlybek Nálibaev oblys ortalyǵyndaǵy temirjol vokzalyn qaıta jańǵyrtý jumysynyń barysymen de tanysty. Qurylys qarqynyn jedeldetý, onyń ishinde jumysty eki aýysymda uıymdastyrý máseleleri talqylandy.
«KAIK» JShS alańynda agroónerkásiptik sektordaǵy ınvestısııalyq jobalar tanystyryldy. О́ńirlik mańyzy bar «Kokshe Industry» ındýstrııalyq aımaǵyn damytýǵa erekshe kóńil bólindi. Búginde munda 300-den astam jumys ornyn quratyn úsh ınvestısııalyq joba júzege asyrylyp jatyr. Aldaǵy ýaqytta taǵy bes iri jobany júzege asyrý jáne 2 myńǵa jýyq jańa jumys ornyn ashý josparlanǵan. 2030 jylǵa deıin jalpy sany 47 jańa óndiris ornyn iske qosý kózdelip otyr.
Jumys saparynyń sońǵy nysany «Samuryq-Energo» AQ júzege asyryp jatqan Kókshetaý qalasyndaǵy jańa jylý elektr ortalyǵynyń qurylys alańy boldy.
Memleket basshysynyń tapsyrmasymen Kókshetaýda qýaty 240 MVt jáne jylý óndirý kólemi saǵatyna 820 Gkal bolatyn JEO salynyp jatyr. «Samuryq-Energo» AQ ınvestısııalar jónindegi bas dırektory Ańsar Aıdarovtyń sózinshe, bıyl stansanyń negizgi nysandarynyń irgetastaryn salý jumysy aıaqtalyp, qajetti ınfraqurylymdy turǵyzý jalǵasyp jatyr. Nysanda ekologııalyq zańnama talaptaryna sáıkes keletin zamanaýı gaz tazartý tehnologııalary qoldanylady. Qurylys kezeńinde shamamen 2,5 myń adam jumyspen qamtylsa, stansa paıdalanýǵa berilgennen keıin 400-ge jýyq maman turaqty jumysqa turady.
Sapar qorytyndysynda Nurlybek Nálibaev barlyq jobalardy ýaqtyly júzege asyrýdyń mańyzdylyǵyn atap ótti.
«JEO qurylysy Memleket basshysynyń erekshe baqylaýynda tur. Oblys ortalyǵynyń turǵyndary bul jobanyń júzege asýyn kóp jyldan beri kútip keledi. Sonymen qatar elimizde alǵash ret 124 temirjol vokzalyn aýqymdy jańǵyrtý jumysy júrgizilýde, onyń ishinde 16 vokzal Aqmola oblysynda ornalasqan. Barlyq jobalardyń belgilengen merzimde aıaqtalýyn qamtamasyz etip, jumys qarqynyn joǵary deńgeıde saqtaý qajet», dedi N.Nálibaev.
