Kezdesý barysynda Memleket basshysy Qazaqstan men Reseı qarym-qatynastary tatý kórshilik jáne odaqtastyq negizde jemisti damyp kele jatqanyn atap ótti.
– Sizdermen Nur-Sultan qalasynda júzdeskenime qýanyshtymyn. Máskeý memlekettik ýnıversıtetiniń fılıaly elordada eki myńynshy jyldary ashyldy. Búginde qazaqstandyq stýdentterge sapaly bilim berip otyrǵan bul oqý orny tabysty jumys isteýde. Jaqynda Máskeýde ótken kelissózder aıasynda Vladımır Pýtınmen bilim salasyndaǵy ekijaqty yntymaqtastyq deńgeıiniń joǵary ekenin atap óttik, sondaı-aq ony josparly túrde damytýǵa ýaǵdalastyq, – dedi Qasym-Jomart Toqaev.
Máskeý memlekettik ýnıversıtetiniń rektory kezdesýge múmkindik týǵyzǵany úshin Qazaqstan Prezıdentine alǵys bildirdi. V.Sadovnıchıı eki eldiń joǵary oqý oryndary arasyndaǵy kóp jyldyq baılanystardyń jemisti bolǵanyn atap ótti.
– Meniń Qazaqstanǵa degen yqylasym erekshe. M.V.Lomonosov atyndaǵy Máskeý memlekettik ýnıversıtetiniń fılıaly Qazaqstandy jańǵyrtýdyń jańa kezeńinde suranysqa ıe, bilikti kadrlardy daıarlaýǵa zor úles qosqanyn maqtan etemin, – dedi Vıktor Sadovnıchıı.
Sonymen qatar, taraptar eki memleket arasyndaǵy mádenı-gýmanıtarlyq yntymaqtastyqtyń ózekti máseleleri jóninde pikir almasty.
