Qalanyń barlyq aýdandaryndaǵy aýlalar, kósheler, avtoturaqtar, demalys oryndary tekserildi.
Jańa týrıstik maýsym qarsańynda qala basshysy astananyń temirjol beketterinde boldy. Nur-Sultan temirjol vokzalynda turaq oryndarynyń jaǵdaıymen tanysyp, turǵyndar men qonaqtarǵa arnalǵan demalys oryndaryn tekserip, oǵan jaqyn aýmaqtardy kógaldandyrý jumystaryn jalǵastyrýdy tapsyrdy. Odan keıin «Nurly jol» jańa temirjol vokzalynyń ınfraqurylymyn tekserdi. Stansııa dırektorynyń aıtýynsha, kólik habynyń ótkizý qabileti táýligine 35 myń adamdy quraıdy. Baqyt Sultanov zańsyz taksı júrgizýshileri máselesin sheshýdi jáne vokzal mańyn «Sergek» kamerasymen jabdyqtaýdy aıaqtaýdy tapsyrdy.
Qalanyń kóshelerin aralaǵan ákim aýla aýmaqtaryn abattandyrý jumystarynyń barysymen tanysty. Beıbitshilik kóshesi boıyndaǵy №31, 33, 35 úıdiń aýlalaryn qarap shyqqannan soń B. Sultanov, aýlalarda avtoturaq oryndarynyń jetkiliksiz ekendigin, avtoturaq keńistigin keńeıtý týraly oılaýdy tapsyrdy.
Budan keıin Nur-Sultan qalasynyń ákimi 2018 jyly Respýblıka dańǵyly men Dúkenuly kóshesiniń qıylysynda elordanyń 20 jyldyǵyna oraı ashylǵan Illıýzııa alańyna bardy. Baqyt Sultanov onyń jaǵdaıyn qanaǵattanarlyqsyz dedi. Saryarqa aýdanynyń ákimi Erǵalı Egemberdıevtiń aıtýynsha, buǵan nysannyń ázirge aýdan ákimdiginiń balansyna ótpeýi jáne osy aımaqqa kimniń jaýapty ekendiginiń belgisizdigi sebep.
Baqyt Sultanov qorshaǵan ortany qorǵaý jáne tabıǵatty paıdalaný basqarmasynyń jumysyn synǵa alyp, orynbasary Arman Turlybekke saıabaqty Saryarqa aýdany ákimdiginiń balansyna aýystyrýdy, ony jónge keltirip, jasyl jelekti joldan aryqaraı tóseýdi tapsyrdy.
Budan basqa, qala ákimi Dúkenuly kóshesindegi súrilgen turǵyn úılerdiń ornyn tekserip, jaýapty tulǵalarmen kósheni jóndeý máselelerin talqylady. Ákimge habarlaǵandaı, Dúkenuly kóshesiniń jalpy uzyndyǵy 1,9 shaqyrymdy quraıtyn Beıbitshilik kóshesinen Fýrmanova kóshesine deıingi aralyǵy jóndeý jumystaryn jobalaý satysynda. Jalpy 24 garajdy jáne alty jeke úıdi buzý kózdelgen. Oǵan qarjylandyrý qajet.
Ákim sondaı-aq, «aqyldy aýdan» jobasy iske asyrylyp jatqan «Jastar» yqsham aýdanyn qarap, Baıqońyr aýdanynyń ákimi Erlan Qanalımovpen aýlalardy abattandyrý jáne joldardy jóndeýge qatysty suraqtardy talqylady. Baqyt Sultanovtyń aıtýynsha, «Jastar» shaǵyn aýdany áli «aqyldy aımaq» bolýǵa daıyn emes, áli de kóp jumystar atqarylýy kerek. Qala basshysy Baıqońyr aýdanynyń ákimine shaǵyn aýdandy abattandyrýǵa qatysty birqatar naqty tapsyrma berdi.
Budan bólek, B. Sultanov «Otan qorǵaýshylar» eskertkishindegi alańǵa baryp, eskertkishti tekserip, alańdy aralap shyqty. Ákimniń buıryǵymen mamyr merekesine deıin osy aımaqta aǵymdyq jóndeý jumystary, al jyldyń sońyna qaraı kúrdeli jóndeý jumystary júrgizilmek.
Ary qaraı Baqyt Sultanov Botanıkalyq baqqa bardy. Munda ákim jolǵa tóselgen kespetasqa nazar aýdardy.Budan bólek ol belgini latyn qarpinde jazylǵan jańa belgige aýystyrý qajettigin atap ótti.
Osy jerde qala basshysy Esil aýdanynyń ákimi Tólegen Zakarıanovpen jáne Arman Turlybekpen aýmaqty abattandyrý, qalalyq senbilikke daıyndyq jáne kógaldandyrý maýsymyna daıyndyǵyn talqylady.
