Oblystyq tótenshe jaǵdaılar departamentiniń bastyǵy Baýyrjan Syzdyqovtyń habarlaýynsha órt 9 qabatty №73 úıdiń balkonynan shyqqan. О́rt sóndirý jumysyna TJD-niń 29 qyzmetkeri men 8 tehnıka tartyldy. О́rtten úıdiń turǵyndary zardap shekken joq. Jalpy aýmaǵy 6 sharshy metrdi quraǵan órt ornynan 50 adam evakýasııalandy.
О́rt bolǵan jerge arnaıy kelip turǵyndarmen kezdesken O.Orazalın tústen keıin barlyq jaýapty memlekettik organdardy jınap, arnaıy tapsyrmalar berdi.
«Bul ekinshi ret qaıtalanyp otyrǵan tótenshe jaǵdaı. Osy jaıt turǵyndar tarapynan narazylyq týdyryp otyr. Aldaǵy ýaqytta mundaı jaǵdaılardy boldyrmaý maqsatynda jan jaqty jumys júrgizýimiz qajet. Qýanyshymyzǵa oraı, órt sóndirý qyzmetiniń shuǵyl kelýiniń arqasynda adam shyǵyny bolǵan joq. Endigi mindet - qala turǵyndarynyń qaýipsizdigin qamtamasyz etý maqsatynda qala ákimdigi osyndaı órt týdyratyn qaptaýlary bar barlyq turǵyn úılerdi anyqtap, esepke alýy tıis» - dedi oblys ákimi jaýapty mamandarǵa tapsyrma berip.
Aıta keteıik, órt shyqqan úıge órt sóndirýshiler 4 mınýtta jetken. TJD qyzmetiniń alǵashqy zertteý jumystarynyń qorytyndysy boıynsha órttiń shyǵý sebebi óshpeı qalǵan temeki nemese sirińkeniń 2013 jyly qaptalǵan úıdiń syrtqy dekoratıvti qaptaýlaryna tııýinen týyndaýy múmkin.
