Qazaqstan Prezıdenti Besinshi Kaspıı sammıtinde qol jetkizgen ýaǵdalastyqtardyń qorytyndysy boıynsha 2018 jyly Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń janynan ashylǵan Teńiz akademııasynyń jumysymen tanysty.
Memleket basshysy keme júrgizýshilerdiń, keme mehanıkteriniń, shtýrmandardyń kóp fýnksııalyq trenajerlik synyptary, sondaı-aq, alǵashqy medısınalyq kómek kórsetýge, órtke qarsy jáne qutqarý jumystaryn uıymdastyrýǵa arnalǵan dárishanalary bar akademııanyń kópbeıindi materıaldyq-tehnıkalyq bazasyn aralap kórdi.
Stýdenttermen beıresmı áńgimelesý barysynda Qasym-Jomart Toqaev zamanaýı standartqa saı sapaly ári arnaıy bilim alýdyń mańyzdylyǵyn atap ótip, olardyń oqýda tabysty bolýyna tilektestik bildirdi.
Ýnıversıtet stýdentteri óskeleń urpaq máselelerine erekshe kóńil bólip, Jastar jyly aıasynda memleket tarapynan qoldaý kórsetilip jatqany úshin Qazaqstan Prezıdentine alǵys aıtty.
Sonymen qatar, Memleket basshysyna ýnıversıtettiń jumystary, sonyń ishinde 1 200 eriktini biriktirip otyrǵan «Qoǵamǵa qyzmet» baǵdarlamasy jóninde aqparat usynyldy.
