Aýdıtorııanyń ashylý saltanatyna dańqty tulǵanyń jıeni, geologııa-mıneralogııa ǵylymdarynyń doktory Aleksandr Tretıakov Almatydan arnaıy kelipti.
«Búgin Qazaqstan ǵylym qyzmetkerleriniń kúni ǵana emes, Qanysh Imantaıulynyń da týǵan kúni. Osy rette biz ýnıversıtetimizdiń G1-301 aýdıtorııasyna ǵulama ǵalym esimin berýdi jón dep sheshtik», - dedi aýdıtorııanyń ashylýynda sóz sóılegen oqý ornynyń prorektory Oleg Gavrılenko.
Qanysh Sátpaev atyndaǵy sý jańa aýdıtorııada ótken konferensııada sóz alǵan ǵalymnyń jıeni geologtyń adamgershilik qasıetteri jaıynda estelik aıtty.
«Ol kisiniń adamdyq kelbetin, qarapaıymdylyǵyn kórsetetin úsh qasıetine toqtalsam deımin. Birinshisi, HH ǵasyrdyń 30 jyldarynyń basynda, eldiń jaǵdaıy qıyn kezde, repressııa qarqyn alyp turǵan shaqta aǵylshyndar Jezqazǵanǵa barlaý júrgizýdiń qajeti joqtyǵyn jetkizip, «mundaǵy ken ornynyń bolashaǵy joq» degen pikir aıtady. Qanysh Imantaıuly bul kezde bar bolǵany 34 jasta edi. Alaıda ol alǵan betinen qaıtpaı nysannyń mańyzdylyǵyn, barlaý jumysyn júrgizý kerektigin dáleldep, aqyry ken ornyn ashýǵa qol jetkizedi. Eger onyń aıtqany durys kelmese, atylyp ta keter me edi.
Ekinshisi, geologtyń Ulybrıtanııaǵa barýy. Sol saparynda osy eldiń eks premer-mınıstri Ý.Cherchıll qaljyńdap: «Barlyq qazaqtar siz sııaqty suńǵaq, batyr tulǵaly ma?» dep surapty. Sonda akademık «O, joq, Cherchıll myrza, qazaqtardyń ishindegi eń kishisi men, halqym menen de bıik» dep jaýap beripti.
Negizi ol kisiniń boıy 2 metrge jýyq bolǵan. Úshinshisi, ǵalym ómiriniń sońǵy jyldarynda qaterli isikke shaldyqqanda dárigerler shet elde em alýǵa keńes beripti. Qanysh Imantaıuly eki aptadaı oılanyp, dárigerlerge: ««Meniń pavlodarlyq jerlesterimniń kóbi tipti Almaty men Máskeýge jete almaı júr. Men shet elge bara almaımyn» dep shet elge barýdan bas tartypty. Sodan soń 4 jyldaı tirlik keship, ómirden ótti ǵoı», - deıdi Aleksandr Tretıakov.
Qazaqstan shyqqan tuńǵysh akademıktiń jıeni sóziniń sońynda «О́skemendikterdiń Qanysh Imantaıulyn erekshe qurmetteıtindikterin jaqsy bilemiz. Buǵan oblys ortalyǵynda úlken dańǵyldyń berilýi dálel. Almatyda, Astanada, Pavlodar pen Qaraǵandyda Qanysh Sátpaevqa eskertkish qoıylǵan. Tulǵaǵa О́skemende de bir eskertkish ornatylsa degen tilegim bar. Bul usynysymdy ákimdik qoldaıdy dep senemin», - dep usynysyn jetkizdi.
О́SKEMEN
