Bekbolat aǵamyzdyń ádebıetke, jazý-syzýǵa esin bilgen kezinen bastap áýes bolǵany qupııa emes. Osy qushtarlyq ony Almatydaǵy qazaqtyń mańdaıyna bitken sol kezdegi jalǵyz ýnıversıtetine alyp keldi. Ol – QazGÝ-diń jýrnalıstıka fakýltetin bitirgen soń Almaty oblystyq «Jetisý», Torǵaı oblystyq «Torǵaı tańy» (qazirgi Qostanaı oblysy), respýblıkalyq «Sosıalıstik Qazaqstan» (qazirgi «Egemen Qazaqstan») gazetterinde jemisti qyzmet atqara júrip, el ómirindegi kókeıkesti máselelerdi, ózekjardy jaıttardy óz ýaqytynda kótere bilgen sheber tildi jýrnalıst.
Sondaı-aq Bekbolat Ádetov – tolaıym pýblısıstıkalyq týyndylarynan bólek, «Báısheshek», «Altynaı», «Jerdegi juldyzdar», «Ińkár kóńil» atty kórkem shyǵarmalardan turatyn tórt kitaptyń avtory, 8 romandy qazaq tilinde sóıletken tamasha aýdarmashy.
Jýrnalıst-jazýshy Bekbolat Ádetov «Egemen Qazaqstan» gazeti ujymyndaǵy eń bedeldi de belsendi qyzmetker boldy. Ol adal da qajyrly eńbegi men kól-kósir biliminiń arqasynda áriptesteriniń arasynda qurmetke bólengen-di. Qazaqstannyń Qurmetti jýrnalısi B.Ádetov Almaty oblysy, Talǵar aýdanynyń qurmetti azamaty atandy.
Byltyr seksenniń seńgirine shyqqan Bekbolat aǵamyzdyń el gazetiniń tarıxynda alar orny erekshe edi.
Jany jaısań, bolmysy bólek, parasatty, sabyrly, salıqaly, qashanda jastarǵa qamqor bolyp júretin aqjúrek Aǵamyzdyń ımany joldas bolyp, jany jannattyń tórinde shalqysyn.
Týǵan-týystaryna, jaqyndary men shákirtterine qaıǵyryp kóńil aıtamyz.
