Resmı qarsy alý rásiminen keıin memleketter basshylary shaǵyn quramda kelissózder júrgizdi. Memleket basshysy jyly qarsy alyp, qonaqjaılyq kórsetkeni úshin Shavkat Mırzııoevke rızashylyq bildirip, osy memlekettik sapardyń mańyzdylyǵyn atap ótti.
– Tuńǵysh Prezıdentimiz – Elbasy Nursultan Ábishuly Nazarbaev myqty ári úılesimdi ekijaqty qatynastardy qalyptastyrýǵa zor úles qosty. Sizder de eki memlekettiń kóshbasshylary retinde Qazaqstan men О́zbekstan arysyndaǵy yntymaqtastyqty bıik deńgeıge kóterdińizder, – dedi Qasym-Jomart Toqaev.
Memleket basshysy ekijaqty yntymaqtastyqtyń sapasy men yqpaldastyqtyń mazmunyna joǵary baǵa berdi, sondaı-aq, kelissózderdiń kún tártibinde turǵan barlyq másele boıynsha jemisti pikir almasatynyn aıtty.
– Meniń mindetim baılanystarymyzdyń sabaqtastyǵy men joǵary qarqynyn saqtaý dep oılaımyn. Men de óz tarapymnan qazaq-ózbek yntymaqtastyǵynyń esh kedergisiz órkendep, damýyna barlyq múmkindikti jasaımyn. Keshe saıası, tarıhı, mádenı, gýmanıtarlyq sııaqty birqatar máselege qatysty aldyn ala pikir almastyq jáne tarıhı turǵydan halyqtarymyzǵa ortaq kóp dúnıe bar degen túsinikke keldik. Bizdi ortaq tarıhı taǵdyrymyz, týystas tilimiz, dinimiz ben mádenı qundylyqtarymyz biriktiredi, – dedi Qazaqstan Prezıdenti.
Sonymen qatar, Qasym-Jomart Toqaev Shavkat Mırzııoevke О́zbekstandaǵy Qazaqstan jylyn ótkizýge múmkindik týǵyzǵany úshin alǵys aıtyp, bul sharanyń eki memleket halqyn jaqyndastyrý turǵysynan alǵanda asa mańyzdy ekenin atap ótti.
Shavkat Mırzııoev Qasym-Jomart Toqaevty Qazaqstan Prezıdenti qyzmetine kirisýimen quttyqtap, О́zbekstan Respýblıkasyna memlekettik saparmen kelgeni úshin rızashylyq bildirdi.
– Qazaqstannyń Tuńǵysh Prezıdenti Nursultan Ábishuly Nazarbaevtyń rólin erekshe atap ótkim keledi. Sol kisiniń arqasynda ózara qarym-qatynastarymyzdyń joǵary deńgeıge kóterilýine qol jetkizdik. Siz de mınıstr, Premer-Mınıstr, Senat tóraǵasy qyzmetterin atqarǵan kezińizde eki el baılanystaryn jaqsartýǵa septigińizdi tıgizdińiz, – dedi Shavkat Mırzııoev.
Sonymen qatar, О́zbekstan Respýblıkasynyń basshysy qazaqstandyq tarapqa ekijaqty baılanystardyń nyǵaıýyna tyń serpin bergen Qazaqstandaǵy О́zbekstan jylyn tabysty ótkizgeni úshin rızashylyq bildirip, atap ótti.
Joǵary dárejede ótken kelissózder barysynda memleketter basshylary óńirlik jáne halyqaralyq kún tártibindegi ekijaqty yntymaqtastyqtyń ózekti máselelerin talqylady.
