Delegasııa quramyna QR Parlamenti Senaty Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Georgıı Kım jáne Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev engen bolatyn.
Sessııa aıasynda qazaqstandyq delegasııa EKPA Hatshylyǵynyń parlamentaralyq yntymaqtastyq jáne saılaýyn baqylaý departamentiniń basshysy Sh.Shahbazıanmen (Fransııa), BAQ jáne aqparattyq qoǵam kishi komıtetiniń tóraǵasy, «Sosıalıster, demokrattar jáne jasyldar toby» EKPA saıası fraksııasynyń ókili M.Tornarmen (Shveısarııa), «Eýropany qoldaýshylardyń lıberaldar men demokrattar alıansy» EKPA saıası fraksııasynyń ókili D.Chýklomen (Ispanııa), EKPA delegasııasynyń basshysy, «Eýropa halyq partııasy» fraksııasynyń prezıdenti E.Zıngerespen (Lıtva), Erkin demokrattar tobynyń múshesi A.Shelechpen (Serbııa), EKPA Saıası máseleler jáne demokratııa komıtetiniń múshesi, EKPA delegasııasynyń basshysy S.Seıdovpen (Ázirbaıjan) jáne basqalarymen kelissózder júrgizdi.
Qazaqstandyq senatorlar eýropalyq áriptestermen Qazaqstannyń saıası úderisterin keńinen talqylady jáne elimizdiń syrtqy saıası baǵyty men demokratııalyq qaǵıdattardy odan ári nyǵaıtýdy qoldaıtyndaryn atap ótti.
Qazaqstan Respýblıkasy Prezıdentiniń aldaǵy kezekten tys saılaýyna erekshe mán berildi. Sh.Shahbazıannyń sózine qaraǵanda osy sheshim jalpyǵa ortaq demokratııalyq standarttarǵa sáıkes bılikti beıbit jáne zańdy túrde berýdiń úlgisi bolyp tabylady. Ol bıylǵy 9 maýsymdaǵy prezıdenttik saılaý barysynda EKPA baıqaý mıssııasynyń Qazaqstanǵa kelýi josparlanyp otyrǵanyn habardar etti.
Qazaqstandyq parlamenttik delegasııa sondaı-aq Assambleıanyń saıası máseleler jáne demokratııa komıtetiniń otyrysyna qatysty. Otyrysta EKPA ulttyq delegasııalar qyzmetiniń tártibi men resimderine túzetýler engizý, sondaı-aq Eýropa Keńesindegi qarjy daǵdarysyn eńserý máseleleri talqylandy.
