«Qazaq óneri aýyr qazaǵa dýshar boldy. 71 jasqa qaraǵan shaǵynda belgili mýzykatanýshy, óner zertteýshisi, ǵalym aǵamyz Jarqyn Shákárim dúnıeden ótti, qaıǵyly habardy estip qabyrǵamyz qaıysyp otyr... Qazaq halqynyń rýhanı kemeldenýine úles qosyp, mýzyka óneriniń halyqtyq múddege saı órken jaıýyna eńbek etken, belgili kúıshi, mýzykatanýshy, ámiretanýshy, qoǵam qaıratkeri Jarqyn aǵamyzdan aıyrylyp qaldyq», - delingen habarlamada.
Osyǵan baılanysty mınıstr marqumnyń otbasyna, týǵan-týystaryna qaıǵyryp kóńil aıtty.
«О́mir boıy týǵan halqyna, onyń rýhanı salasyna qaltqysyz qyzmet etken jomart júrekti jaqsy adamnyń bul qazasy qabyrǵamyzdy qaıystyryp ketti. Bizdiń bir kóńilge medet etetinimiz, Jarqyn aǵanyń artynda ólmeıtuǵyn murasy qaldy. Ardaqty aǵamyz shynynda da bárimiz jaqsy kórgen abzal azamat edi. Ol óziniń barynsha adal da taza qalpymen, aqjarqyn da jaıdary minezimen janymyzǵa jaqyn boldy. Nury peıishte shalqysyn. Qazaq rýhanııatyna jasaǵan adal qyzmeti eshqashan umytylmaıdy...», - dep kóńil aıtty Arystanbek Muhamedıuly.
Jarqyn Jaqııauly Shákárim 1947 jyldyń 4 mamyrynda Shyǵys Qazaqstan oblysy Aıagóz qalasynda dúnıege kelgen. 1968 jyly Qaraǵandy mýzykalyq ýchılıshesin támamdaǵan, al 1973 jyly Almaty konservatorııasyn (qazirgi Qazaq ulttyq konservatorııasy) aıaqtaǵan. 1973 - 1976 jyldary Máskeýdegi Búkilodatyq «Melodııa» fırmasynyń Almaty kúıtabaqqa jazý stýdııasynda aǵa redaktor, 1976 - 1980 jyldary «Jalyn» baspasynda redaktor, 1980 - 1982 jyldary Respýblıkalyq mýzyka aspaptary murajaıynyń dırektory, 1982 - 1983 jyldary Qazaq fılarmonııasynda kúıshi-lektor qyzmetterin atqarǵan. 1983 jyldan Qazaq teledıdarynyń mýzyka baǵdarlamalary Bas redaksııasynyń redaktory, bólim meńgerýshisi bola júrip «3amana bulbuldary», «Dombyra sazy», «Terme», «Shashaý», «Mýzykalyq kınojınama», «Kúı-shejire», «Injý-marjan» tárizdi habarlardy jaryqqa shyǵarǵan.
