«Túrki tildes halyqtardyń ortaq rýhanı qundylyǵy men quqyqtyq dástúriniń qazirgi qoǵammen sabaqtastyǵy» atty halyqaralyq konferensııaǵa Joǵarǵy Sottyń sýdıasy Baǵlan Maqulbekov, Ázirbaıjan Respýblıkasynyń Joǵarǵy Sotynyń sýdıasy Askerov Gýrbet aga ogly, Mańǵystaý oblystyq sotynyń tóraǵasy Erjan Daýlıev, Mańǵystaý oblysy ákiminiń orynbasary Rýslan Sákeev, Túrkııanyń Gazı Ýnıversıtetiniń professory Erdoǵan Ihsan, Tatarstan Respýblıkasy Qazan federaldyq ýnıversıtetiniń zań ǵylymdarynyń kandıdaty, dosent Demeeva Aınur, zań ǵylymdarynyń doktorlary Qyrǵyzstan Respýblıkasynan professor Tabaldıeva Venera, Ázirbaıjan Respýblıkasynan Safarov Azer, sonymen qatar, respýblıka sýdıalary, ýnıversıtettiń oqytýshylar quramy men jas ǵalymdar qatysty.
Halyqaralyq konferensııany Erjan Daýlıev quttyqtaý sózimen ashyp, konferensııa ótip otyrǵan Qazaqstan Halyqtar assambleıasynyń keń ǵımaratynda byltyr Kaspıı mańyndaǵy 5 memlekettiń Prezıdentteri Besinshi sammıtte bas qosyp, mańyzdy máseleler talqylaǵanyn, al búgin alys-jaqyn shet elderdiń ǵalym-professorlary men zańgerleri túrki tildes halyqtardyń ortaq quqyqtyq dástúrin bólisýge jınalyp otyrǵanyn atap ótti.
Sot tóraǵasy konferensııa baǵdarlamasymen jáne qatysýshylarmen tanystyrdy. Konferensııanyń I sessııasynda sóz sóılegen Baǵlan Maqulbekov elimizdegi tarıhı qundylyqtardyń ıgiligi týraly baıandasa, Askerov Gýrbet aga ogly Ázirbaıjan Respýblıkasyndaǵy sot-quqyq reformalaryn baıandady.
Konferensııa barysynda shetelden kelgen ǵalym-professorlar Túrik azamattyq quqyǵynyń syrtqy beınesi: qoldanylý aıasy men negizgi qaǵıdalary, azamattyq quqyqtyń ónegelik bastaýlary, avtorlyq quqyqtardy quqyqtyq qorǵaý salasyndaǵy Ázirbaıjan Respýblıkasynyń zańnamalar júıesi, Qyrǵyzstan Respýblıkasynyń qazirgi quqyqtyq júıesindegi rýhanı qundylyqtardyń orny týraly baıandamalar oqydy.
Sondaı-aq, qazaq ádet quqyǵy boıynsha sóz teńdiginiń quqyqtyq qundylyq retinde júzege asý mehanızmderi, otbasy qundylyqtarynyń qazirgi zańnamadan kórinis tabýy, dala bıleriniń bitimgerlik rásimderi men túrki halyqtaryna ortaq tatýlastyrý ádisteriniń sabaqtastyǵy, qazirgi tańda quqyqtyq mádenıetti damytý máseleleri týraly baıandamalar tyńdaldy, ortaǵa salyndy.
Baıandamashylar túrli jańashyldyqtarmen bólisip, túrki halyqtaryna ortaq sot praktıkalaryna erekshe qyzyǵýshylyq tanytty.
- Qatysýshylar Eýrazııanyń kindiginde ornalasqan Qazaqstannyń – túrki halyqtarynyń qara shańyraǵyna aınalǵanyn aıtyp, halyqtar arasyndaǵy ortaq máselelerdi talqylaý dostyq qarym-qatynasty nyǵaıta túsetinin atap aıtty. Konferensııa qorytyndysy boıynsha túrkitildes halyqtarǵa ortaq quqyq júıesin jandandyrý máseleleri týraly sheshim qabyldandy. Jıynda tyńdalǵan úzdik baıandamalar men ǵylymı jumystar arnaıy jınaq bolyp basylatyn boldy, deıdi Mańǵystaý oblystyq sotynyń baspasóz hatshysy Gaýhar Nurhan.
Qonaqtar Mańǵystaýdyń tarıhı-ólketaný murajaıyn aralap, óńirdiń ádebı-tanymdyq muralarymen, eskertkishterimen tanysty.
Is-shara sońynda qatysýshylardyń barlyǵyna «360 áýlıeli Mańǵystaý» atty ensıklopedııalyq kitap pen sertıfıkattar tabystaldy.
Mańǵystaý oblysy
