Álem • 17 Sáýir, 2019

О́zara baılanystardy damytýdyń jańa múmkindikteri. Sholý

808 ret kórsetildi

Memleket basshysy Qasym-Jomart Toqaev О́zbekstan Prezıdentiniń shaqy­rýy­men alǵashqy memlekettik saparyn osy elge jasady. Eki kúndik sapar aıasynda prezıdentter Q.Toqaev pen Sh.Mırzııoevtiń shaǵyn jáne ke­ńeıtilgen quramda kelissózder ótkizýi, birqatar qujatqa qol qoıýy, son­daı-aq О́zbekstandaǵy Qazaqstan jylynyń ashylý saltanatyna qatysýy kórshiles elder arasyndaǵy jyly shyraıly baılanystyń, ystyq yqylastyń kórinisi boldy. Qazaqstan Prezıdentiniń alǵashqy memlekettik sapary týraly sheteldik buqaralyq aqparat quraldary kóptegen habar taratyp, kórshiles memleketterdiń birlesken josparlary týraly pikirlerin jarııalady. О́zbekstan aqparattyq agenttikteri Qasym-Jomart Toqaevtyń sapary eki el yntymaqtastyǵynyń damı túsýine sep bolatynyn jarysa jazdy.

Tarqata aıtar bolsaq, «О́zbekstan» Ulttyq aq­parat agenttigi Qazaqstan Prezıdentin О́z­bekstan Pre­mer-Mınıstri Abdýlla Arı­pov kútip alǵanyn, al Kók­saraıdaǵy kezdesýdiń resmı bólimi shaǵyn quramdaǵy kelissózge ulasqany týraly jazady.

Al kun.uz onlaın portaly kezde­sý­­­diń ekijaqty ynty­maq­tastyqtyń ny­ǵaıýyna sep­tigin tıgi­zetinin aıta kele, «Sh.Mırzııoev atalǵan sapardy bu­ǵan deıin qalyptasqan saıası dıalog­tyń jalǵasy dep bi­letinin aıtty» dep jazdy. Sonymen qatar óz ha­barla­malarynda Sh.Mırzııoevtiń «Qazaq­­stan Prezıdenti retindegi alǵashqy mem­le­kettik saparyńyzdy О́zbekstannan bas­taǵa­nyńyzdy joǵary baǵalaımyz. Biz úshin Qazaqstan Respýblıkasy – shekaralas memleket, strategııalyq seriktes. Yntymaqtastyǵymyz ben árip­tes­ti­gimizdiń barlyq baǵytta damyp jatqa­ny bizdi qýan­tady» degen sózin keltirgen.

«Spýtnık О́z­bekstan» aqparat agent­tiginiń habar­laýynsha, keńeıtilgen quram­daǵy otyrysta О́zbekstan men Qazaqstan arasyndaǵy 2017-2019 jyldarǵa arnalǵan eko­nomıkalyq seriktestik stra­te­gııasynyń nátıjesi sóz bolǵan. Budan bólek, habarlamada mınıstrlik ókilderi men eki eldiń iri kompanııalarynyń basshylary qatysqan jınalysta aldaǵy jylda eki el arasyndaǵy taýar aınalymyn 5 mlrd AQSh dollaryna ósirý kelisilgeni týraly jazylǵan.

Aqparat agenttiginiń jazýynsha, kezdesý barysynda Qasym-Jomart Toqaev «Shavkat Mıromonuly, Siz Tuńǵysh Prezıdent – Elbasy Nursultan Nazarbaev ekeýińiz memleketaralyq qatynasty jańa beleske alyp keldińiz. Osy jetistikti odan ári damytý – paryzym dep bilemin. Baýyrlas О́zbekstanmen seriktestik Qazaqstan úshin de mańyzdy» degen.

Sondaı-aq memleketter basshylary kezdesý barysynda ekijaqty qatynasty nyǵaıtý, saýda, kólik, ónerkásip kooperasııasy, týrızm jáne basqa da salalardaǵy seriktestik týraly sóz etken. Odan bólek Aýǵanstandaǵy jaǵdaıdy turaqtandyrýǵa atsalysý, aýmaqtaǵy qaýipsizdik pen beıbitshilikti nyǵaıtý máselelerin talqylaǵan.

Agenttik aqparatyna súıensek, ekijaqty qa­ty­nas boıynsha úkimetaralyq komıssııaǵa saý­da baılanysynyń nomenklatýrasyn ósirý, ekono­mıkalyq kooperasııanyń uzaq merzimdi formasyn damytý tapsyrylǵan. Oǵan qosa eki el ókilderi 2018 jyldyń qarashasynda Shymkent qalasynda ótken aımaqaralyq seriktestik forýmynyń nátıjelerimen bólisken.

«Prezıdentter eki el arasyndaǵy demakrasııa pro­sesine kóńilderi tolatynyn bildirip, ótkizý pýnktteriniń nátıjeli jumysy týraly sóz qozǵady.

Taraptar kólik, logıstıka, ónerkásiptik kooperasııa salasyndaǵy birlesken jobalar atqarýǵa kelisti. Olardyń aıtýynsha, atalǵan salalardy da­mytý memleket arasyndaǵy eksport pen tranzıt múmkindikterin arttyrmaq» delingen agenttik aqpa­ratynda.

Budan ózge ózbekstandyq aqparat agenttikteri Qazaqstandaǵy О́zbekstan jyly joǵary baǵalanyp, Qazaqstan Prezıdentiniń memlekettik sapary aıasynda bastaý alǵan О́zbekstandaǵy Qazaqstan jyly atalǵan sharanyń jalǵasy bolatyny týraly jazady.

«Novostı Ýzbekıstana» gazeti О́zbekstanda Qazaqstan jyly saltanatty túrde bastalǵanyn aıtyp, el prezıdentteri memleketter arasynda túzilgen mádenı-gýmanıtarlyq baılanysty odan ári nyǵaıta beretinin jazady. Gazettiń jazýynsha, halyqtar ara­syndaǵy dostyqty dáripteýge baǵyttalǵan sharalardy jalǵastyrý eki el arasyndaǵy senimniń, qoldaýdyń, baýyrlastyqtyń bekı túsýine sebep bolmaq. Basylym atalǵan shara óner, ǵylym, bilim, bıznes ókilderine jańa múmkindikter berip, eki eldiń mádenıetiniń jaqyndasýyna alyp keledi deıdi.

Odan bólek, О́zbekstan gazeti «Ortalyq Azııa» ha­lyqaralyq saýda-ekonomıkalyq yntymaqtastyq or­talyǵyn qurý máseleleri jónindegi ózara túsi­nistik týraly memorandýmǵa, Qazaqstan Aqparat jáne qoǵamdyq damý mınıstrligi men О́zbekstan Mı­nıstrler kabıneti janyndaǵy Din isteri jónindegi komıtet arasyndaǵy yntymaqtastyq týraly memorandýmǵa qol qoıylǵanyn habarlady.

«Gazeta.uz» basylymy О́zbekstandaǵy Qa­zaqstan jylynyń saltanatty ashylýy Tashkenttegi Halyqaralyq forýmdar saraıynda ótkenin habarlaıdy. Memleket basshylary qatysqan sharada Qazaqstan Prezıdenti Q.Toqaev ózbek halqyna ystyq yqylasy men qonaqjaılylyǵy úshin alǵys aıtqanyn habarlady. Sonymen birge basylym Q.Toqaevtyń «Eki el baılanysynda qıyn másele joǵyn senimmen aıta alamyn. Kerisinshe, taraptar dostyqty nyǵaıtýǵa bar kúshterin salyp jatyr. О́zbek halqy biz úshin qashanda jaqyn baýyrymyz bolǵan. Bizdi de olardyń jaqsy qabyldaıtynyna senimdimiz. Baýyrlas elder bir taǵdyr men ortaq keleshekpen baılanysqan» degen sózin keltiredi.


Daıyndaǵan

Svetlana ǴALYMJANQYZY,

«Egemen Qazaqstan»


Sońǵy jańalyqtar

Shymkentte taǵy bir aýdan qurylady

Qoǵam • Búgin, 16:58

Almatyda qant qymbattap barady

Qoǵam • Búgin, 16:45

Dollar baǵamy ósti

Qarjy • Búgin, 16:12

Uqsas jańalyqtar