Almatydaǵy M.Áýezov atyndaǵy Ádebıet jáne óner ınstıtýty Abaıtaný jáne ádebıet tarıhy bóliminiń meńgerýshisi, professor Serikqazy Qorabaı, Semeıdegi Shákárim atyndaǵy memlekettik ýnıversıtetiniń professory, tarıhshy Muhtarbek Kárimov, osy oqý ornyndaǵy aqyndar mektebiniń jetekshisi Aıman Aqtanova sekildi ǵalymdar qatysqan shara barysynda Jarma óńiriniń esimderi elge áıgili, dańqty tulǵalaryn ulyqtaý jaıy jan-jaqty sóz boldy. Ásirese ádebıet zertteýshisi Serikqazy Qorabaıdyń aıtqan usynystary kópshiliktiń kóńilinen shyqqany anyq. Bireý biler, bireý bilmes, «Kúldir de kúldir kisinetip, Kúreńdi miner me ekenbiz» dep jyr tolǵaǵan ataqty Aqtamberdi jyraýdyń Abaı aýdany Qundyzdy aýyly shetindegi Júrekadyr jotasyna jerlengeni belgili.
S.Qorabaıdyń aıtýynsha, tulǵaǵa ótken ǵasyrdyń 80-jyldar shamasynda sol kezdegi Semeı oblystyq partııa komıtetiniń birinshi hatshysy Keshirim Boztaevtyń kúsh salýymen tórt qabyrǵaly, shaǵyn beıit turǵyzylypty. «Ol ýaqytta úlken kesene turǵyzýǵa ruqsat berilmedi ǵoı. Aqtamberdi jyraýdyń Keńes zamanynda salynǵan beıitin eńseli kesenege aınaldyrý – barshamyz úshin úlken paryz. Bir ókinishtisi, ne Semeıde, ne О́skemende jyraý atynda kóshe joq. Ataqty Túbek jáne Sabyrbaı aqyndardyń da beıitteri jermen jeksen bolyp ketken. Múlde belgi joq. Erteń múlde eskerýsiz qalady ǵoı. Aıtpaqshy, Jarma aýdanynyń ortalyǵy – Qalbataýda T.Baıqoshqaruly degen kóshe bar. Shynyn aıtsam, muny eshkim túsinbeıdi. Osyny Túbek aqyn kóshesi dep durystap ataý kerek. Ol zamanda aqyndy eshkim T.Baıqoshqaruly dep ataǵan joq qoı», deıdi ǵalym.
