Jıyn barysynda Úkimet basshysynyń orynbasaryna
oblystaǵy iri kásiporyndardyń áleýmettik
mindetterdi oryndaý baǵytynda atqaryp jatqan jumystary týraly baıandaldy.
– Eger 15-20 jyl buryn memleket shaǵyn bızneske aıaǵynan turýǵa kómektesse, qazir kerisinshe, bıznes memleket pen qoǵamǵa qol ushyn berýde. Kásipkerlerdiń ınvestısııalary óńirlerdiń áleýmettik damýyna áser ete bastady. Buǵan Elbasynyń sol kezdegi sheshimi yqpal etti. Dál osynda, Jezqazǵanda on jyl buryn bizdiń Tuńǵysh Prezıdentimiz bıznestiń áleýmettik jaýapkershiligi týraly máseleni kótergen bolatyn, – dedi jıynda Qaraǵandy oblysynyń ákimi Erlan Qoshanov.
Eske salsaq, 2008 jyly Jezqazǵanda bıznestiń áleýmettik jaýapkershiligi jóninde birinshi forým ótken bolatyn. Elimizdiń Tuńǵysh Prezıdenti sol kezde osy taqyrypty alǵashqy bolyp kóterip, otandyq iri kásiporyndardyń áleýmettik jaýapkershiligin qurý jóninde tapsyrmalar bergen edi.
Jalpy, Qaraǵandy oblysynda bıznestiń áleýmettik jaýapkershiligine, demeýshilikke jáne qaıyrymdylyq sharalaryna basa nazar aýdarylady. Bıyl áleýmettik jobalar boıynsha iri kompanııalarmen arada 48 memorandýmǵa qol qoıý josparda bar. Osy maqsattar úshin 3 mıllıard teńgege jýyq qarjy qarastyrylǵanyn da aıta ketken jón.
Jıynda sóz alǵan Gúlshara Ábdihalyqova basty maqsat bıznes ókilderi jáne jumys berýshiler tarapynan jumysshylar aldynda eńbekaqy boıynsha qaryzdarǵa jol bermeý ekendigin atap ótti.
– Ekinshi másele, jalaqyny birtindep kóterý. Taǵy bir mańyzdy másele – eńbek qaýipsizdigi. О́ńirdegi iri kásiporyndarda qyzmetkerler úshin laıyqty eńbek sharttaryn jasaý qajet. Bıznestiń áleýmettik jaýapkershiligi Jezqazǵan úshin de asa mańyzdy, sebebi, qazir memleket áleýmettik máselelerge, kópbalaly jáne az qamtylǵan otbasylarǵa erekshe kóńil bólýde. Aldaǵy úsh jylda áleýmettik jobalar men baǵdarlamalarǵa 2,3 mlrd teńge bólinedi, – dedi Gúlshara Ábdiqalyqova.
Eńbek jáne halyqty áleýmettik qorǵaý mınıstri Berdibek Saparbaev óńirdegi iri kásiporyndardy áleýmettik jaýapkershilikke basa nazar aýdarýǵa shaqyrdy. Eń basty mindet – jumyssyzdyqty boldyrmaý. Ol úshin óndiris oshaqtarynda jumys oryndaryn saqtap qalý kerek. Sonymen birge, kópbalaly jáne az qamtylǵan otbasylardy qoldaý maqsatyndaǵy qaıyrymdylyq jobalarǵa da aıryqsha kóńil bólý kerektigin atap ótti mınıstr.
– Biz elimiz boıynsha myńnan astam iri kásiporyndy zerttedik. Olarda qansha kópbalaly qyzmetkerler bar jáne olardyń qanshasynda baspana joqtyǵyn anyqtadyq. Bul másele Úkimet otyrysynda qaraldy. Biz kásiporyndardan osy qyzmetkerlerdi birinshi kezekte baspanamen qamtamasyz etýdi jáne bala kútimine baılanysty úıde otyrǵan kópbalaly qyzmetkerlerdi, múgedek balalardy asyrap otyrǵan analardy qoldaýdy suraımyz, – dedi B.Saparbaev.
О́ńirdiń shaǵyn jáne orta bıznes ókilderi jyl saıyn kópbalaly otbasylarǵa, múgedekterge, UOS ardagerlerine 100 mln teńgege jýyq qarjyǵa ataýly áleýmettik kómek kórsetetinin de aıta ketken jón. Budan bólek, demeýshiler men mesenattardyń kómegi arqasynda sońǵy eki aıdyń ishinde áleýmettik az qamtylǵan 10 otbasy baspanaly boldy.
Qaraǵandy oblysy,
Jezqazǵan qalasy
