8 jáne 12 jas aralyǵyndaǵy talantty ul-qyzdardy taýyp, bolashaǵyna jol ashý maqsatyndaǵy baıqaýǵa talaptylardyń kóp bolýy túsinikti, óıtkeni, birinshiden – aımaqtardan oza shyqqan eń úzdik 17 bala kúzde baıqaýdyń aqtyq kezeńinde óner kórsetedi, ekinshiden aqtyq kezeńde úzdik tanylǵan óren elimizdegi tańdaýly mýzykalyq bilim ordasynyń granty men «Dısneılend» ertegi álemine joldama alady. Sondaı-aq, joba ıesi «Jandaný álemi» qoǵamdyq Qory olarǵa qoldaý kórsetip, shyǵarmashylyq qabiletin ushtaýǵa, damytýǵa kómektesedi. Buǵan deıingi ótkizilgen úsh maýsym qorytyndysy boıynsha, irikteý kezeńderine 20 156 bala qatysyp, balabaqshalar men mektepterge arnalǵan 56 jańa ánder jazylǵan. Sondaı-aq, televızııalyq efırlerde 12 konserttik shoý ótkizilip, 24 kúndelik, 128 beınerolıkter kórsetilgen. Atalmysh án baıqaýynan túlegen kóptegen qarlyǵash-ónerpazdar qor qoldaýymen mýzykalyq mektepter men kolledjderde bilim alýda.
-Qazir talantty balalar óte kóp, olar birneshe tilde sóılep, án shyrqaı alady jáne ánderdi jaqsy tańdaı alady. Biraq, olardyń barlyǵynda óz ónerlerin tanytý, kórsetý múmkindigi bar deı almaımyz. Biz talantty balalardy alǵa qaraı jetelep, qoldaý kórsetýimiz qajet. Sondyqtan «Bala daýysy» án baıqaýynyń alar orny zor jáne qajet. Oryndaýshynyń qaı tilde oryndaýyna jáne stıline, ıaǵnı janryna shekteý joq – ol dástúrli án be nemese estradalyq án be, álde sheteldik ánshiniń repertýarynan ba – bizge eń bastysy balanyń talanty mańyzdy, deıdi án baıqaýyna qazylyq etýshi ánshi B.Kýshkalıev.
Án baıqaýynda jeńimpaz ataný qýanyshy Aqtaý qalasyndaǵy №13 mekteptiń oqýshysy 11 jasar Qarjaýbaeva Dılıaraǵa buıyrdy. Ol qazaq, orys jáne aǵylshyn tilderinde ánderdi minsiz oryndap, qazylardyń nazaryna birden ilikti. Endi ol uıymdasytrýshylar tarapynna jasalǵna múmkindik aıasynda vokal, horeografııa jáne ártistik qabiletin arttyratyn sabaqtarǵa qatysyp, kúzde Almatyda ótetin aqtyq kezeńde Mańǵystaýdyń namysyn qorǵaıtyn bolady.
Mańǵystaý oblysy
