Saılaý • 18 Sáýir, 2019

Halyqtyń mandatyn alýdyń máni zor

Búginde prezıdenttik ınstıtýt kóptegen elderdiń saıası júıesiniń ajyramas bóligi bolyp otyr. Prezıdenttik bılik, bul – memlekettik bılikti júzege asyrý nysany. Prezıdenttik respýblıkalarda prezıdent janama (AQSh) nemese tikeleı (Qazaqstan) saılaý arqyly saılanady jáne aýqymdy naqty bılikke ıe.

Egemen Qazaqstan

Memleket basshysy óz mandatyn halyqtan alady jáne bul – prezıdenttik bıliktiń kúshi, Qazaqstan Respýblıkasy Prezıdentiniń jan-jaqty mandatynyń saıası jáne ıdeologııalyq negizi.

Qazaqstandyq qoǵam men memleket damýynyń negizgi baǵyttary prezıdenttikke úmitkerdiń saılaýaldy baǵdarlamasyna engiziledi. Sondyqtan prezıdenttik pozısııaǵa naqty úmitker úshin elektorattyń basym bóliginiń túpkilikti daýys berýi Qazaqstannyń damýyndaǵy negizgi bolashaq baǵyttarynyń jobasyn maquldaýy bolyp sanalady. Saılaýshylardyń daýystarymen rastalǵan olar tutastaı memlekettiń jáne onyń naqty qurylymdarynyń saıası kúshi bolady. Qazaqstan Respýblıkasynyń Prezıdenti óziniń saılaýaldy tuǵyrnamasyn júzege asyrýy tıis.

Qazaqstanda elimizdiń Tuńǵysh Prezıdenti – Elbasy N.Á.Nazarbaevtyń erekshe tulǵasy arqasynda prezıdenttik bıliktiń kúshti ınstıtýty quryldy. El ishinde jáne shet memleketterde úlken bedelge ıe Nursultan Nazarbaev árqashan qazaq halqynyń óz saıasatyna degen qoldaýyn alý úshin saılaýǵa túsip otyrdy.

Elbasynyń joǵary úlgisinen keıin Qazaqstan Prezıdenti Qasym-Jomart Toqaevtyń kelesi jyly sáýir aıynda laýazymynyń merzimi aıaqtalýyn kútpesten kezekten tys prezıdenttik saılaý ótkizý týraly málimdemesi elimizdegi bıliktiń birden-bir qaınar kózi retinde halyqqa degen joǵary qurmetti bildiredi.

Búgin biz memlekettiligimizdiń belgili bir synaq kezeńine jetkenin kórip otyrmyz. Qazaqstanda alǵash ret bıliktiń tranzıti ótýde, ony zańdy, laıyqty, tynyshtyqpen júzege asyrýǵa tıispiz. Elimizdegi áleýmettik turaqtylyqtyń buzylýyna eshqandaı da sebep bolmaýy kerek.

Búginde álemdik ekonomıka men geosaıasatta syn-qaterler az emes. Sondyqtan halyq kez kelgen yqtımal qaýip-qaterlerge alańdaýshylyq bildirmeı qoımaıdy.

Táýelsizdik jyldary ata-babalarymyz armandaǵan kóptegen máseleler oryndaldy. Biz óz memleketimizdi, ekonomıkamyzdy damyttyq, tutastaı alǵanda Qazaqstan aýmaǵynda jańa ómirdi qalyptastyrdyq. Qazaqstan burynǵy Keńes Odaǵynyń barlyq elderiniń ishinde bir adamǵa shaqqanda jalpy kólemdegi sheteldik ınvestısııalardy tartý boıynsha Ortalyq Azııada kóshbasshy boldy. Bizdiń elimizge dúnıejúzilik bedelge ıe iri kompanııalar qyzyǵýshylyq bildirdi. Osy oraıda biz úshin sheteldik bıznes pen ınvestorlar elimizde senimdilik jaǵdaıynda jumys isteı berýi mańyzdy.

Qazaqstanǵa tek sheteldik ınvestorlar men bıznes qana emes, búkil álemdik qoǵamdastyq Ortalyq Azııa aımaǵyndaǵy kóshbasshy retinde, halyqaralyq qatynastardy úılestirýdiń belsendi jaqtaýshysy retinde qaraıdy. Sondyqtan memleketaralyq qatynastardyń konfıgýrasııasynda Qazaqstannyń ulttyq senimniń berik mandatyn alǵan Prezıdentpen tanylýy óte mańyzdy.

Prezıdenttik saılaýdy ótkizý týraly Jarlyqqa qol qoıý arqyly Prezıdent Q.Toqaev alǵa naqty qadam jasady. Bul bastamany barsha qazaqstandyqtar qoldaýy qajet. Memleket basshysy Konstıtýsııanyń kepili retinde sóılep, halyqty osy jyldyń 9 maýsymyndaǵy prezıdenttik saılaýda belsendi qatysýǵa shaqyrdy.

Zarema ShÁÝKENOVA,

Prezıdent janyndaǵy Qazaqstan strategııalyq zertteýler ınstıtýtynyń dırektory