Ýnıversıtet rektory Gaýhar Ahmetovanyń aıtýynsha, byltyr oqý bitirgen túlekterdiń 96 paıyzy jumyspen qamtylǵan. Ýnıversıtet 2014 jyldan bastap «Máńgilik el jastary – ındýstrııaǵa!» atty «Serpin» baǵdarlamasy negizinde tehnıkalyq jáne agrarlyq mamandyqtar boıynsha stýdentter daıyndaıdy. Bıylǵy oqý jylynda 16 bilim berý baǵdarlamasy boıynsha alǵashqy 267 stýdent oqýlaryn támamdaıdy. Qazir ýnıversıtette barlyǵy 20 mamandyq boıynsha 550 stýdent bilim alýda. Jyl boıy jumysqa ornalasý máseleleri boıynsha jınalystar, kezdesýler, trenıngter, jármeńkeler ótkiziledi. Búginde 42 stýdent «Qazaqstan Alıýmınııi» AQ, «KSP Steel» JShS PF, «PREK» AQ, «ERG Service» AQ sekildi óndiristik kásiporyndarda jumysqa ornalasty.
Bastysy, «Serpin» baǵdarlamasynyń alǵashqy túlekterine óńirde jumys isteý úshin oblys ákimdigi men oqý orny «Eńbek» nátıjeli jumyspen qamtý jáne jappaı kásipkerlikti damytý baǵdarlamasynyń úshinshi baǵyty – Eńbek resýrstarynyń utqyrlyǵyn arttyrýǵa arnalǵan jeńildikterin usynýda. Máselen, bıylǵy túlekter «О́ńiraralyq qonys aýdarý» baǵdarlamasyna qossa, olarǵa turǵyn úıdi jalǵa alýǵa sýbsıdııa beriledi. Kommýnaldyq shyǵyndardy óteý úshin beriletin qarajat ta qolaıly bolmaq. Túlekterdiń ata-analaryna ýnıversıtet atynan hat jiberildi. Iаǵnı, olardyń otbasylary óńirge kelip, jeńildikterdi balalarymen birge paıdalana alady.
Bul jaqsy jańalyq. Ekinshiden, «Munaı-hımııa zaýyty» JShS-men «Munaı isi» mamandyǵy boıynsha bakalavrıat stýdentterine arnalǵan dýaldy bilim berýdiń birlesken baǵdarlamasy júrgizilýde. Stýdentter aptasyna eki kún zaýytta tájirıbelik bilim alady. Baǵdarlamaǵa qatysýshy stýdentter jumysqa da ornalasyp úlgeredi, tıisti jalaqyǵa qajetti jeńildikterge de ıe bolady.
Byltyr Sharbaqty aýdanyndaǵy «Pobeda» JShS aýyl sharýashylyǵy kásipornynda da dýaldy bilim berý boıynsha oqý ortalyǵy ashyldy. Onda agrotehnologııalyq fakýltettiń stýdentteri oqıdy. Barlyq qolaıly turmystyq jaǵdaı jasalǵan.
Sonymen birge ýnıversıtet ǵalymdary ınnovasııa men bıotehnologııa salasyndaǵy jobalardy da qolǵa ala bastady. Bul kúnderi oqý ornynda 3 ǵylymı-óndiristik ortalyq jumys isteýde. Barlyq ǵalymdardyń kúsh-jigerin biriktirý jáne olardyń jumysynyń tıimdiligin arttyrý maqsatynda oqý ornynda «Agroınnovasııa jáne bıotehnologııa ǵylymı-zertteý» ınstıtýty qurylyp jatyr.
Ǵalym Toqtar Bekseıitovtiń aıtýynsha, ınnovasııa men bıotehnologııalardyń jańashyl ádisterin engizý aýyl sharýashylyǵynyń tıimdiligin arttyrýda asa mańyzdy. Ǵalymdar elimizdiń Bilim jáne ǵylym mınıstrligi, Aýyl sharýashylyǵy mınıstrligi jelileri boıynsha jáne aýyl sharýashylyǵy taýaryn óndirýshilerdiń ótinimderi boıynsha birneshe jobany iske asyrdy. Zerthanany akkredıtteý jáne jańa jabdyqtardy satyp alý boıynsha jumystar júrgizilýde. Osynyń nátıjesinde óńirdiń agroónerkásiptik kesheni salalaryn damytýǵa ǵylymı qoldaý kórsetilmek.
Negizi oqý ornynda bakalavrıattyń 64, magıstratýranyń 49 jáne doktorantýranyń 8 mamandyǵy boıynsha modýldik bilim berý baǵdarlamalary ázirlengen. Modýldi bilim berý baǵdarlamalary kezeńinde oqý josparlary, jumys baǵdarlamalaryn ázirleýge jumys berýshiler qatysady. Sóıtip naqty jumys berýshiniń talaptaryna saı bolashaq mamannyń eńbek joly qalyptasady.
Qazirgi jańashyldyq – óndiris oryndarynda kafedra fılıaldary qurylýda. Bul jumys berýshiler men seriktester ýnıversıtet túlekteriniń tájirıbelik daıyndyǵyn jaqsartýǵa, bilim berý baǵdarlamalarynyń mazmunyn jetildirýge, mamandardy jergilikti jerge daıarlaýǵa kómektesedi. Kafedralar fılıaly «Eýroazıattyq energetıkalyq korporasııasy», Aqsý ferroqorytpa zaýyty, «Kompanııa Neftehım LTD», «Polımer» kásiporyndary, oblystyq Sanıtarlyq-epıdemıologııalyq saraptama ortalyǵy, Sáýlet jáne qurylys basqarmasy, Ishki saıasat basqarmasynyń aqparattyq-saraptamalyq ortalyǵy, Standarttaý jáne sertıfıkattaý ınstıtýty, «Vagonservıs» AQ, Pavlodar aýdanyndaǵy aýyl sharýashylyǵy ǵylymı-zertteý ınstıtýty, oblystyq gıdrometeorologııa ortalyǵy, týrızm jáne ekologııa, balalar-jasóspirimder ortalyǵy, G.Potanın atyndaǵy oblystyq ólketaný mýzeıi sııaqty óńirdegi 65 óndiris jáne iri seriktestikterde ashyldy.
