-Memlekettik qyzmetkerlerdi yntalandyryp, erekshe yqylasyn oıatý maqsatynda uıymdastyrylatyn konkýrstyń búgingi tańda aýqymy óte keń. Ony aýdan jáne oblys ortalyqtarynan qatysýǵa nıet bildirgen úmitkerlerdiń sanynyń artýynan baıqaýǵa bolady. 2018 jyldyń qorytyndysy boıynsha 27 úmitker óńirlik kezeńde baq synasa, onyń 20-sy Respýblıkalyq kezeńge joldama aldy. Olardyń ishinde Mańǵystaý oblysynyń atynan qatysqan eki qatysýshymyz Baýyrjan Tuıaqov pen Ramır Alekberov jeńimpaz atandy. Qatysýshy bir sátke bolsyn jumysbastylyqtan arylyp, bilim men biliktiligin kórsetip, tájirıbesin shyńdaıdy. Sondyqtan memlekettik qyzmetkerlerdiń oń ımıdjin qalyptastyryp, osy salaǵa qyzyǵýshylyǵyn arttyrý qajet, deıdi QR memleketik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń memlekettik qyzmet basqarmasynyń jetekshi mamany Hakımbek Atadýsov.
Atalǵan konkýrsqa 1 jyl memlekettik qyzmette ótili bar, ákimshilik jáne tártipti jazalary joq memlekettik qyzmetshiler qatysa alady. Bul oraıda úmitker óz qyzmetindegi ózekti máselelerdi sheshýge qosqan jeke úlesi, alǵa qoıǵan maqsattaryn júzege asyrý barysynda jetken jetistikterimen erekshelenedi.
-Bul konkýrs maǵan erekshe motıvasııa boldy. Sanamda jeńiske degen umtylys, qyzmetime degen zor yqylasym bıikke shyǵardy. Uıqysyz ótkizgen kúnderim tekke ketpegenin, búginde áriptesterimniń maǵan maqtanyshpen qaraǵanynan túsinemin. Bir túıgenim, adam ózin damytýdan eshqashan jalyqpaý kerek. Bul saıystyń arqasynda kóp nárse úırendim. Respýblıkalyq kezeńde oblysymyzdyń atyn asqaqtatqanyma qýanamyn, deıdi «Úzdik qyzmetker- 2018» jeńimpazy, Mańǵystaý oblysy jastar máselesi jónindegi basqarma basshysy Baýyrjan Tuıaqov.
О́ńirlik jáne Respýblıkalyq kezeńde ótkiziletin konkýrsqa qujattar 5- sáýir men 5- mamyr aralyǵynda qabyldanady. Úmitkerdiń konkýrsqa qatysý týraly ótinishi, sondaı-aq «Ne sebepti men úzdik memlekettik qyzmetshi ataǵyna laıyqtymyn?» taqyrybynda jazylǵan motıvasııalyq essesi bolýy mindetti.
Qatysýshylardy baǵalaý úshin konkýrstyń birinshi kezeńinde óńirlik komıssııa qurylady. Oza shaýyp, úzdik dep tanylǵan jeńimpazdar 23-maýsym «Memlettik qyzmetkerler kúni» qarsańynda marapattalyp, Respýblıkalyq kezeńge joldama alady.
-Jyl saıyn ár mekeme jas mamandarmen tolyǵýda. Olardyń «Ádep kodeksinen» bastap, zańnamalardy bilý deńgeıin saralaý úshin bul konkýrstyń mańyzy zor. Byltyrǵy jylmen salystyrǵanda qatysýshylar deni artyp, konkýrsqa degen qyzyǵýshylyq basym bolǵany bizdi qýantady. Bul shara memlekettik qyzmetkerdiń ózin basqa qyrynan tanytyp, shyǵarmashylyq turǵydan damyp, kóptegen múmkindikterge qol jetkizýine mol múmkindik. Sondyqtan bul sharanyń joǵary deńgeıde ótýine qoǵam bolyp atsalysýymyz kerek, degen pikirde komıssııa músheleri –«FORTE BANK» AQ fılıalynyń dırektory Abbat О́risbaev jáne «Mańǵystaý Medıa» JShS dırektory Aısulý Dýtbaeva.
Mańǵystaý oblysy
