ÚMIT — BILIMDI URPAQTA

Amangeldi SOPBEKOV, polıtehnıkalyq kolledj dırektory, oblystyq máslıhattyń depýtaty, ǵylym doktory. Elbasy ındýstrııalyq-ınnovasııalyq damý baǵdar­lamasy boıynsha Úkimetke tapsyrmalar berdi. Jaqynda oblysymyzǵa Premer-Mınıstrdiń birinshi orynbasary О́mirzaq Shókeev bastaǵan jedel jumys toby issaparmen keldi. О́ńirdegi qolǵa alynyp jatqan iri jobalardy kórdi, damý baǵdarlamasyna kirgen jumystardyń aıaǵyna deıin esh kedergisiz oryndalatyndyǵyn aıtty. “Bizdiń shıkizattyq emes eksportshylardy qoldaý ındýstrııalandyrýdyń sheshýshi baǵyty bolýy kerek”, dep atap kórsetti Memleket basshysy. Shynynda, Qazaqstan jurttyń kózi úırengen shıkizat otany bolýdan góri ındýstrııalyq-ınnovasııalyq damýdy negizge alǵan memleket bolarlyqtaı jaǵdaıy bar. Memleketimiz óńdeýshi kásiporyndarǵa úlken artyqshylyqtar jasaýda. Osyndaı múmkindikterdi júzege asyrýda bilimdi urpaqqa artylyp otyrǵan úmit erekshe. Kásiptik jáne teh­nıkalyq bilim berý kásibı standarttarǵa negizdelip, qatań túrde ekonomıkanyń qajettilikterimen ózara baı­lanystyrylýy kerek, degen Nursultan Ábishuly joǵary bilim sapasy eń joǵary halyqaralyq talaptarǵa jaýap berýi tıis ekendigin de atap kórsetti. Eldegi joǵary oqý oryndary álemniń jetekshi ýnıversıtetteriniń reı­tın­gi­ne enýge umtylǵandary jón. Mundaı joǵary talaptarǵa jalpy bilim beretin orta mektepterimiz daıyn ba degen saýal tóńireginde oılasatyn máseleler de barshylyq. Ońtústik Qazaqstan oblysynyń ákimi Asqar Myrzahmetov problemalardy kóre bilý, sheshý joldaryn izdeý qasıetimen erekshelenedi. Oblystyq máslıhattyń de­pýtaty bolǵannan keıin saılanǵan okrýgimizden aryz­dar túsip jatady. Onyń birparasy mektepterge baıla­nysty. Túrli quqyq qorǵaý organdary bal kórgen aradaı mektepter men aýrýhanalardy aınalshaqtap júredi, irili-usaqty kemshilik tapsa, basshylaryn áýreleıdi. Onyń sońy mektep basshylarynyń ustazdardan aqsha jınap, tekserýshilerdiń aýzyn maılaýyna ulasyp jatady. О́tken jyly oblys mektepteri 2983 márte tekserýden ótipti. Alyp-satatyn saýda orny, taýarlar shyǵaryp jatqan ón­diris emes, jas urpaqty tárbıelep jatqan bilim oshaq­ta­ryna tekserýshiler nege úıir, álde tiske jumsaq kóre me? Oblys basshysy bilim oshaqtaryndaǵy sybaılas jemqorlyqqa qatysty quqyq buzýshylyqtyń qarjyǵa qatystylyǵyn aıtyp, Úkimet aldyna mekteptegi esep-qısap shtattaryn qysqartyp, aýdandyq, qalalyq bilim bólimderiniń janynan ortalyqtandyrylǵan býhgalterııa ashýdy usyndy. Munyń artyqshylyqtary kóp. Qarjy únemdeledi, tekserýshiler azaıady. Eń bastysy, mektep dırektory revızordyń kóńilin qalaı tabamynmen emes, óz mindeti – sapaly bilim, sanaly tárbıe berý isimen aınalysady. Elbasynyń joǵary jáne orta arnaýly oqý oryn­dary­na qoıyp otyrǵan talaptarynyń údesinen shyǵý úshin biz osyndaı kúrmeýli máselelerimizdi sheship alýy­myz qajet. Onsyz aýyl mańyn shıyrlap, órisin taýysyp alǵan jaman malshydaı alysqa uzaı almaımyz. Bul bas­ta­many muǵalimder qaýymy qýattap otyrǵanyn aıtý kerek. О́ıtkeni, tekserýshilerden zardap shegip, taban aqy, mańdaı terimen tapqan jalaqysynan jyryp beretinder solar ǵoı. Orta mektepke úlken reformalar qajet. Sońǵy jyldary muǵalimdik qyz-kelinshekterdiń kásibi sanalyp, er-azamattardyń sanyn azaıtyp aldyq. Áıel zatyn kemitkenimiz emes, mekteptegi uldarda erlerge tán asqaq qasıetterdiń azaıyp bara jatýy qoǵamdy alańdatady. Sabaq josparyna qatysty qaǵazbastylyq bilim berýdiń jańa tásilderin izdeýden góri, taptaýryndylyqqa uryndyratyndyǵyn da aıtqan jón. Baıaǵyda kóp aıtylyp, kóp nasıhattalatyn “Bitibaeva mektebi”, “Aıtqalıev mektebi” syndy ozat is-tájirıbelerdi azaıtyp alǵandaımyz. Elbasynyń joǵary mektepke qoıǵan talaptaryn oryndaý úshin orta mektepterdegi túıinderdi sheshý kóp jeńildik ákeler edi. Ońtústik Qazaqstan oblysy