ERTEŃIMIZ – SAPALY BILIMDE

Qazirgi ǵalamdaný zamany qandaı eldiń bolmasyn damý jo­lyn anyqtaýyna úlken salmaq salyp otyr. HHI ǵasyr, bir jaǵy­nan, ǵylym men óndiristiń qar­qyn­dap damyǵan, ınnovasııalyq tehnologııalar ǵasyry bolsa, ekin­shi jaǵynan, damyǵan elder ekono­mıka áleminde óz baǵyt-baǵdaryn bekem ustap, shamalary jetkenshe, eshkimdi jaqyndatpaı, oq boıy alda júrýdi maqsat tutýda. Osyn­daı kúrdeli kezeńde bar eldiń ekonomıkasyna aýyr júk salǵan jahandyq daǵdarys bastaldy. Bul daǵdarys qaı elge bolmasyn, úl­ken syn saǵaty boldy. Elimiz de bul daǵdarystan shet qala almady. Biraq, kóregendik danalyǵyn dú­nıe júziniń ozyq oıly ǵulamalary moıyndap otyrǵan, bizdiń Elba­symyz Nursultan Ábishuly Nazar­baevtyń salıqaly saıasatynyń arqasynda, qazaq eli bul daǵ­darys­qa tótep berdi. Osy daǵdarystyń sabaǵyn bizge tereń túsindirip kelgen Elbasy óz Joldaýynda: “Meniń basty maqsatym – elimizdiń aldaǵy onjyldyqtaǵy ekonomıkalyq órleýin qamtamasyz etip, jańa múmkindikterge jol ashý”, – dep oıyn ashyq aıtady. Meniń oıymsha, bul Joldaý eshbir qazaqstandyqty beı-jaı qaldyrǵan joq. Sebebi, ár adam­nyń kókiregine tereń oı salǵan, eldiń keleshek damýynyń anyq baǵyt-baǵdaryn kórsetken úlken joldaý boldy. Joldaýda elimizde bilim berý sapasyn dúnıe júziniń ozyq elderi deńgeıine jetkizý maqsatynda at­qa­rylýy qajetti eń túıindi máse­leler naqtyly aıtylǵan. Elimiz egemendik alǵannan beri Elbasy jastarǵa sanaly tárbıe, sapaly bilim berý máselelerin kún tártibinen shyǵarǵan emes. Bizderdi Elbasynyń bilim berý salasyn tereń biletini tánti etedi. Birde, Elbasy, japon elinde ǵasyrlar boıy saqtalyp kele jatqan ult­tyq rýhanı adamgershilik tárbıe­niń mańyzyna erekshe kóńil ból­gen bolsa, ústimizdegi jyly Úkimet múshelerimen ótkizgen májiliste, fınn eliniń damý úrdisin úırený­diń qajettigine toqtaldy. Osy eki eldiń ǵaryshtap damýynyń túp ne­gizi olarda bilim berý júıeleriniń ǵylymı negizde durys uıymdas­tyrylǵanynda bolyp otyr. Bilim berý salasynda eńbek etetin qyzmetkerler aldyna naq­tyly maqsat-mindetter júktel­gen. 2020 jyly elimizde 12 jyl­dyq bilim berý júıesi nátıjeli jumys jasaýy tıis, kásiptik jáne tehnıkalyq bilim ekonomıka suranystaryna tolyq jaýap berýleri kerek, elimizdiń joǵary oqý oryndary reıtingi álemdegi ozyq ýnıversıtetter reıtingi toptamasyna qosylýy qajet. Bilimniń túp qazyǵy mektepte qalanady. Irgetasy joq jerde ǵı­marat ta joq. 12 jyldyq bilim berý júıesine ótýdiń basty maq­saty – bilim berýge negizdelgen oqytý júıesinen, nátıjege baǵdar­lanǵan bilim berý júıesine kóshý. Mundaı júıe barlyq damyǵan elderde nátıjeli jumys jasaýda. Osyndaı júıe tolyq iske asyryl­ǵan jaǵdaıda ǵana bilim sapasy qarqyndy damıtyn bolady. Bul bizdiń bárimizdiń de ortaq maqsatymyz bolýy kerek dep oılaımyz. Qazirgi jahandaný zamanynda elim, jerim, tilim dep soqqan júregi bar, hám zeıindi de zerdeli jastar tárbıelegen jaǵdaıda ǵana Qazaq eliniń keleshegi kemel bolatynyn eskergenimiz abzal. Asqarbek QUSAIYNOV, Qazaqstan Pedagogıkalyq ǵylymdar akademııasynyń prezıdenti.