KÚN TÁRTIBINDE – ADAM KAPITALY

Astanada “Nur Otan” HDP, Bilim jáne ǵylym, Eńbek jáne halyqty áleýmettik qorǵaý mınıstrlikteri, “Shetel ınvestor­larynyń qazaqstandyq keńesi” qaýymdastyǵy men “Atameken” odaǵy” UEP-tiń uıym­dastyrýymen “Qazaqstan Respýblıkasyndaǵy adam resýrstaryn damytý: talaptar men sheshimder” atty halyqaralyq konferensııa ótti. Jıynda elimizdiń adam kapıtalyn damytý ınstıtýtynyń máseleleri, eńbek rynogy men bilim salasynyń arasyndaǵy tepe-teńdikti túzýge arnalǵan Ulttyq kvalıfıkasııalyq júıeniń qurylýy, kásibı standarttardy daıyndaý tetikteri, adamnyń quzyrettiligin baǵalaý, biliktiligin arttyrý, tehnıkalyq jáne kásibı biliktilikti damytý joldaryn izdeý, ol úshin osy salalardaǵy bilim berý júıesin reformalaý arqyly olardy damytý, mamandardyń básekege qabilettiligin arttyrý aıasynda úılesimdi tulǵany qalyptastyrý máseleleri talqylandy. Konferensııanyń alǵashqy kúni bolǵan oty­rystarda osy máseleler boıynsha “Nur Otan” HDP-nyń hatshysy S.Gromov, Prezıdent janyn­daǵy Shetel ınvestorlarynyń qazaqstandyq keńesi qaýymdastyǵynyń basqarma tóraıymy Z.Qana­pııanova, Bilim jáne ǵylym, Eńbek jáne halyqty áleýmettik qorǵaý mınıstrlikteriniń jaýapty hat­shylary F.Qýanǵanov pen B.Sadyqov, “Atameken” odaǵy” UEP-tiń tóraǵasy A.Perýashev sóz sóılep, óz pikirlerin bildirdi. Olardyń aıtqandarynyń to­qe­teri adam degenimiz qanshalyqty qyzmetine kó­birek júginseń, sonshalyqty qaırala túsetin kapı­tal. Onyń bilimi, jumys isteý qabileti, quzyrettiligi ýaqyt ótken saıyn arta túsedi. Sondyqtan qaı kezde bolsyn biz adamnyń múmkindikterine basa mán berip, olardyń qyzmetin elimizdiń ári qaraıǵy damýyna paıdalanýy úshin eń bastysy adamnyń ózine qolynan keletin isti dáleldettirip, boıyna otansúıgishtik qasıetterdi qalyptastyrýymyz qa­jet. Jıynda bildirgen pikirlerinde osyndaı toq­tamǵa kelgen sheshender adamnyń múmkindikterine baı­lanysty Elbasynyń jyl saıynǵy joldaýla­ryn­da aıtylyp kele jatqanyn, onyń sondaı-aq, eli­mizdiń 2020 jylǵa deıingi damýynyń strategııa­lyq josparynda kórinis tapqanyn kóldeneń tartty. Osy oraıda sóz sóıleýshiler qazirgi ekonomıkalyq jaǵdaıda adamnyń múmkindikterin paıdalanǵan kezde onyń jumys isteýi, ónimdiligi men básekege qabilettiligi sııaqty faktorlardy basshylyqqa alýymyz kerek degen pikirlerin bildirdi. Dastan KENJALIN.