Kelissózder barysynda Memleket basshysy Qazaqstan men Koreıa Respýblıkasynyń senimdi ári strategııalyq áriptes ekenin atap ótti.
– Eki halyqtyń mádenı jáne saýda baılanystary Uly Jibek joly zamanynda órkendep, ǵasyrlar boıy jalǵasyp keledi. Qazaq jáne koreı tilderiniń Oral-altaı tobynda bolýy halyqtarymyzdyń tarıhynyń da jaqyndyǵyn ekenin kórsetedi, – dedi Qazaqstan Prezıdenti.
Qasym-Jomart Toqaev Qazaqstannyń Tuńǵysh Prezıdenti Nursultan Nazarbaevtyń Qazaqstan men Ońtústik Koreıa qarym-qatynastarynyń qalyptasyp, nyǵaıýyna zor úles qosqanyn erekshe atap ótti.
– Ekijaqty seriktestiktiń bastaýynda Elbasy turady. Ol elderimiz ben halyqtarymyzdyń arasyndaǵy dostyq pen yntymaqtastyqtyń berik irgetasyn qalady, – dedi Memleket basshysy.
Qasym-Jomart Toqaev Qazaqstannyń táýelsizdik jyldarynda eki eldiń qarym-qatynastary is júzinde barlyq baǵyt boıynsha yqpaldastyqtyń sapaly ári jańa deńgeıine kóterilgenin aıtty. Sondaı-aq, Úkimetaralyq komıssııa men Qazaqstan-Ońtústik Koreıa iskerlik keńesiniń jumysyn joǵary baǵalady.
– Ońtústik Koreıa Qazaqstan úshin saýda-ınvestısııalyq jáne tehnologııalyq yntymaqtastyqty damytý turǵysynan mańyzdy on eldiń biri bolyp tabylady. О́zara taýar aınalymy kóleminiń qarqyndy ósýin erekshe atap ótemin. Byltyrǵy jyldyń qorytyndysy boıynsha onyń kórsetkishi rekordtyq deńgeıge, ıaǵnı 4 mıllıard dollarǵa jetip, 2017 jylǵa qaraǵanda eki eseden astam ósti. Investısııa salasyndaǵy yntymaqtastyǵymyz josparly túrde damyp keledi. Koreıadan Qazaqstanǵa tartylǵan tikeleı ınvestısııa kólemi 7 mıllıard dollarǵa jetti. Ońtústik koreıalyq bıznes tamaq ónerkásibi, ken baıytý, avtomobıl jáne ekonomıkamyzdyń basqa da salalarynda tabysty eńbek etýde, – dedi Qazaqstan Prezıdenti.
Memleket basshysy eki eldiń mádenı-gýmanıtarlyq baılanystaryn nyǵaıtýǵa koreı dıasporasy zor úles qosqanyn atap ótip, káristerdiń Qazaqstandaǵy iri etnıkalyq toptardyń qataryna kiretinin aıtty. Qasym-Jomart Toqaev elimizde turatyn káristerdiń etnomádenı ereksheligin saqtaý úshin Qazaqstan Úkimeti budan bylaı da barlyq jaǵdaı jasaıtynyn aıtty.
Koreıa Respýblıkasynyń Prezıdenti «Qazaqstan – 2050» damý Strategııasyna oń baǵa berip, Ortalyq Azııa elderiniń arasynda Qazaqstannyń joǵary qarqynmen órkendep kele jatqanyn atap ótti.
– Qazaqstan Koreı túbegindegi beıbit úderisti qoldaıdy. Osy sátti paıdalanyp, qoldaý kórsetkenderińiz úshin rızashylyǵymdy bildiremin. Qazaqstan ıadrolyq qarýdan óz erkimen bas tartqannan keıin ekonomıkalyq damýǵa qol jetkizdi. Bul Koreı túbegi úshin óte mańyzdy úlgi bolyp tabylady, – dedi Mýn Chje In.
Kezdesý sońynda Qasym-Jomart Toqaev eki el arasyndaǵy yntymaqtastyqty odan ári órkendetý turǵysynan búgingi sapardyń máni zor ekenin, Memleket basshysy retinde Qazaqstan men Ońtústik Koreıanyń dostyǵyn odan ári nyǵaıtýǵa yqpal etetinin aıtty.
