Qasym-Jomart Toqaev pen Koreıa Respýblıkasynyń Prezıdenti Mýn Chje In jetekshi koreı kompanııalary júzege asyryp jatqan ınvestısııalyq jobalardyń kórmesin aralap kórdi.
Memleket basshysy bıznes forýmdy uıymdastyrýǵa belsendi atsalysqan Koreıa halyqaralyq saýda qaýymdastyǵyna rızashylyǵyn aıtyp, bul kezdesý eki el arasyndaǵy saýda-ekonomıkalyq yntymaqtastyqtyń odan ári keńeıe túsýine tyń serpin beretinine senim bildirdi.
Qazaqstan Prezıdenti Koreıa Respýblıkasynyń Azııa óńirindegi iri saýda seriktesteriniń biri ekenin atap ótip, Ońtústik koreılik bıznestiń 1996 jyldan beri Qazaqstan ekonomıkasyna 7 mıllıard dollarǵa jýyq ınvestısııa salǵanyn aıtty.
– Bizdiń elderimiz qurylys ınfraqurylymynda, aýyl sharýashylyǵynda, mashına jasaý isinde, qarjy, densaýlyq saqtaý jáne ekonomıkanyń basqa da salalary boıynsha birlesken jobalardy júzege asyrýda. Koreılik iri bıznestiń yntymaqtastyqqa qyzyǵýshylyq tanytýy qýantady. Bıyl koreılik kompanııalardyń qatysýymen Almatynyń úlken aınalma jolynyń qurylysy bastalady. Bul joba taǵy bir birlesken «jetistik tarıhy» bolatyny sózsiz, – dedi Qazaqstan Prezıdenti.
Memleket basshysy shetel kapıtalyn tartý jáne qolaıly ınvestısııalyq ahýal qalyptastyrý úshin Qazaqstanda qolǵa alynǵan sharalarǵa jan-jaqty toqtaldy.
– Búginde Qazaqstanda iskerlik bastamalar men ınvestısııalardy júzege asyrý úshin qolaıly jaǵdaı jasalýda. Elimiz halyqaralyq arenada qarqyndy damyp kele jatqan memleketterdiń biri retinde tanyldy. Qazaqstan bıznes júrgizý jeńildigi jóninen Dúnıejúzilik banktiń «Doing Business 2019» reıtınginde 28-orynda. Sheteldik ınvestorlar keńesi men «Astana» halyqaralyq qarjy ortalyǵy tabysty jumys isteýde. Jalpy, Táýelsizdik jyldarynda Qazaqstanǵa 320 mıllıard dollardan astam sheteldik tikeleı ınvestısııa tartylǵan, – dedi Qasym-Jomart Toqaev.
Qazaqstan Prezıdenti Ońtústik Koreıa basshysynyń memlekettik sapary jáne bıznes forým aıasynda qol jetkizilgen ýaǵdalastyqtar elderimiz arasyndaǵy saýda-ekonomıkalyq, ınvestısııalyq jáne mádenı baılanystardy odan ári nyǵaıtýdyń negizi bolatynyna senim bildirdi.
***
Qazaqstan-Ońtústik Koreıa bıznes forýmyna eki eldiń isker toptarynan 500-den astam ókil qatysty. Shara qorytyndysy boıynsha mashına jasaý, medısına, ınfraqurylym jáne tamaq ónerkásibi salalaryna qatysty jalpy quny 3,2 mıllıard dollar bolatyn 30-ǵa jýyq qujatqa qol qoıyldy. Sonyń ishinde, Shymkent qalasynda jáne Túrkistan oblysynda turǵyn úı qurylysyna, «check-up» kópsalaly ortalyǵyn qurýǵa, jeńil avtomobılder, lıftter, kondıterlik ónimder, teledıdarlar, medısınalyq ımplanttar óndirisine, medısınalyq mekemeler ashýǵa jáne basqa da salalarǵa qatysty ýaǵdalastyqqa qol jetkizildi.
