Qazaqstan men Mysyr arasyndaǵy dostyq baılanystyń rámizine aınalǵan Sultan Beıbarystyń murasyn jańǵyrtý jumystary 2007 jyly bastalǵan. Sol jyly 28 qazanda eki eldiń úkimetteri arasynda kelisim jasalyp, atalǵan meshitti restavrasııalaý jobasyna 12 mln AQSh dollary mólsherinde bıýdjet belgilengen. Soǵan sáıkes, Qazaqstan tarapy 4,5 mln AQSh dollaryn bóldi. Qalǵan bóligin Mysyr úkimeti qarjylandyryp, joba 2011 jyldyń qazanynda aıaqtalýy kerek bolǵan. Biraq sol kezdegi saıası jáne ekonomıkalyq daǵdarys sebebimen jumys toqtap qalǵan edi.
Endi atalǵan tarıhı nysandy jańǵyrtý jumystary qaıta qolǵa alynbaq. Qazaqstannyń elshisi Arman Isaǵalıev Mysyr Arab Respýblıkasy (MAR) Parlamentinde Ýaqyptar mınıstri Muhtar Djýmaamen kezdesip, onda Mysyr úkimetiniń Sultan Beıbarys meshitin qalpyna keltirý úshin 181 mıllıon fýnt, ıaǵnı 10,5 mıllıon AQSh dollaryn bólgeni málim boldy. Buǵan qosa, Ýaqyptar mınıstrligi óz qarajatynan bul jobany tez aıaqtaý maqsatynda qosymsha 10 mıllıon fýnt bergenin aıtty. Bul jańalyq jańǵyrtý jumystarynyń kóp uzamaı aıaqtalatynyn bildiredi.
Byltyr qazan aıynda, ıaǵnı 7 jyldan soń, Sultan Beıbarys meshitiniń restavrasııalaý jumystary qaıta bastaldy. Jobany MAR Kóne eskertkishter mınıstrligi jáne bas merdiger «Arab kontraktors» kompanııasy iske asyrady. Meshittiń shańyraqty bólmeleri, dálizi, kúmbezi, munaralary qaıta kóterilip, ortalyq alań men syrtqy qabyrǵalary jóndeýden ótedi. Jobanyń tehnıkalyq baqylaýyn mysyrlyq arheologtar men tarıhı sáýletshilerden qurylǵan arnaıy komıssııa júrgizedi.
Sultan Beıbarystyń ámirimen sol dáýirdiń ozyq sáýlet úlgisindegi bul meshit 1267 jyly boı kótergen. Záýlim ǵımarattyń aýmaǵy 10 myń sharshy metr aýmaqty alyp jatyr, al tas qabyrǵalarynyń bıiktigi – 11 metr. Salynǵanyna segiz ǵasyr bolǵan meshittiń tek bıik baǵanalary ǵana sol kúıi saqtalǵan. Bul nysan boıyn qaıta tiktegennen keıin eldegi eń tanymal tarıhı jáne týrıstik ortalyqtardyń birine aınalady degen senim bar.
