Lıngvıstıkalyq komıssııanyń quramy Ortalyq saılaý komıssııasynyń 2015 jylǵy 27 aqpandaǵy qaýlysyna ózgerister engizýmen jańartylǵan bolatyn. Onda Ortalyq saılaý komıssııasynyń janyndaǵy lıngvıstıkalyq komıssııanyń quramy bekitilip, fılologııa ǵylymdarynyń doktory, professor, L.N.Gýmılev atyndaǵy Eýrazııa ulttyq ýnıversıteti túrkitaný kafedrasynyń meńgerýshisi (kelisim boıynsha) Myrzataı Joldasbekov tóraǵa bolyp taǵaıyndaldy.
Osyǵan oraı komıssııa músheleri ózderiniń jumysyna qatysty uıymdastyrý máselelerin, «Qazaqstan Respýblıkasynyń prezıdenttigine kandıdattyń memlekettik tildi erkin meńgergendigin anyqtaý rásimi týraly» Ortsaılaýkomnyń 2005 jylǵy 31 tamyzdaǵy qaýlysymen aıqyndalatyn Qazaqstan Respýblıkasynyń prezıdenttigine kandıdattyń memlekettik tildi erkin meńgergendigin anyqtaý rásimin talqylady.
Osy qaýlyǵa sáıkes memlekettik tildi erkin meńgergendigin anyqtaý úshin aldymen lıngvıstıkalyq komıssııa usynǵan taqyrypqa kólemi eki betten aspaıtyn jazbasha tapsyrma jazý beriledi. Odan keıin kólemi úsh betten aspaıtyn baspa mátinin oqý usynylady. Al lıngvıstıkalyq komıssııa usynǵan taqyrypqa saı kópshilik aldynda sóz sóıleýge keminde on bes mınýt ýaqyt beriledi. Bul týraly Myrzataı Joldasbekov:
«Qazaqstan Respýblıkasynyń Prezıdentin saılaý qarsańynda lıngvıstıkalyq komıssııa qurylady. Osyǵan oraı búgin biz birinshi májilisti ótkizdik. Atalǵan komıssııa tóraǵasy etip meni taǵaıyndady. Komıssııa hatshysy bolyp pedagogıka ǵylymdarynyń doktory, professor, «Nazarbaev Ýnıversıtet» DBBU «Rýhanı jańǵyrý» Mádenı ortalyǵynyń dırektory Gúltas Qurmanbaı bekitildi. Jalpy zań boıynsha prezıdenttikke kandıdat óziniń memlekettik tildi erkin meńgergendigi jóninde emtıhan tapsyrady. Emtıhan úsh kezeńnen turady. Aldymen jazbasha ótedi. Ol úsh betten aspaýy tıis. Jazýǵa bir saǵat ýaqyt beriledi. Eger kandıdat osy ýaqyt ishinde úlgire almadym dese, oǵan taǵy jarty saǵat ýaqyt qosylady. Munan soń komıssııa músheleri ol jazbany muqııat tekseredi. Ekinshi kezeńde kandıdat sol komıssııa usynǵan mátindi oqıdy. Ol taqyryptardy lıngvıstıkalyq komıssııa aldyn ala bekitedi. Sony prezıdenttikke kandıdat ózi tańdap alyp, 15 mınýt oqıdy. Komıssııa músheleri ony muqııat tyńdaıdy. Kandıdat erkin oqýy tıis. Úshinshi kezeńde úmitker komıssııa aldynda sóz sóıleıdi.Onyń da taqyryby bekitilgen. Prezıdenttikke kandıdat eldiń tarıhyn, mádenıetin, táýelsiz Qazaqstannyń barlyq jetistikterin tolyq bilýi tıis. Munyń bárin komıssııa músheleri jan-jaqty talqylaıdy», dedi.
Al lıngvıstıkalyq komıssııanyń otyrysyna onyń músheleri men prezıdenttikke kandıdattan basqa, Ortalyq saılaý komıssııasynyń músheleri baıqaýshylar retinde qatysýǵa quqyly. Lıngvıstıkalyq komıssııanyń sheshimi komıssııa músheleri sanynyń kópshilik daýysymen ashyq daýys berý arqyly qabyldanyp, otyrys hattamasymen resimdeledi jáne otyrysqa qatysyp otyrǵan Ortalyq saılaý komıssııasynyń múshesine dereý beriledi.
Osylaı dep otyrysty qorytyndylaǵan lıngvıstıkalyq komıssııa músheleri ózderiniń jumysy ashyq jáne jarııaly túrde júzege asyrylatynyn, buqaralyq aqparat quraldary kandıdattardyń árqaısysy boıynsha sheshim qabyldaý prosesin baıqaýǵa múmkindik alatynyn atap ótti.
