Respýblıkalyq «Nomad explorer» ekspedısııasynyń músheleri «Ońtústik ańyzdary» taqyrybymen ótken saıahatta Aqmeshit úńgirine aıaldap, Domalaq ana kesenesine zııarat jasady. Sondaı-aq Shaıandaǵy Appaq Ishan meshitiniń tarıhymen tanysty. О́lketanýshy, «Ońtústik ańyzdary» baǵytynyń avtory Erlan Syzdyqtyń aıtýynsha, saıahatshylardyń alǵan áseri keremet. Olardy ólkeniń tabıǵaty men ańyzdary qatty qyzyqtyrǵan.
Uıymdastyrýshylardyń aıtýynsha, buǵan deıin respýblıka kóleminde 3 ekspedısııa ótken, degenmen aýqymy jáne qatysýshylar sany jaǵynan eń úlkeni – osy «Ońtústik ańyzdary» bolyp otyr. Aıta ketelik, Marǵulan Seısembaevtyń bastamasymen qurylǵan ekspedısııa quramynda elge tanymal qoǵam qaıratkerleri, zııaly qaýym ókilderi, ólketanýshylar, jýrnalıster, kásipkerler men sportshylar jáne basqa da sala ókilderi bar.
"Ońtústik ańyzdary" ekspedısııasy bir aptaǵa josparlanǵan. Birneshe jyldan beri elimizdiń kórikti jáne tarıhı mańyzy bar jerlerine saıahat jasap, ishki týrızmdi damytýǵa atsalysyp júrgen «Nomad Explorer» ekspedısııasynyń baǵyty Jambyl jáne Túrkistan oblystaryn qamtıdy. Saıahatshylar sapar barysynda Aqsý shatqaldary, Aqmeshit úńgiri sııaqty tabıǵı jáne Arystan bab kesenesi, Qoja Ahmet Iаsaýı kesenesi, Domalaq ana mazary, kóne Saýran, Otyrar qalalary sııaqty tarıhı eskertkishterdi kóredi. Eskertkishterdi tamashalaýmen qatar, ekspedısııa músheleri trenıngterge qatysyp, pikir almasý alańynda qozǵalǵan taqyryp aıasynda oılaryn bildirmek.
Túrkistan oblysy
