О́tken demalys kúnderi «QazAvtoJol «UK» AQ-nyń Almaty fılıaly Almaty oblysynyń polısııa departamentimen birlesip kóshpeli keńes ótkizdi. Keleli kezdesýde «Almaty–О́skemen» avtojolynyń 287-615 shaqyrym aralaǵyndaǵy «Taldyqorǵan-Qalbataý» ýchaskesinde jol qozǵalysy qaýipsizdigin qamtamasyz etý máselelerin talqylady.
Keńeske «CITIC Construction» merdigerlik kompanııasynyń jáne tehnıkalyq qadaǵalaý qyzmetteriniń basshylary qatysyp, jóndeý jumystary júrip jatqan ýchaskelerdi aralady. Tekserý nátıjesi boıynsha anyqtalǵan eskertýlerdi joıý úshin birqatar tapsyrmalar berildi:
- barlyq ýchaskelerdegi shuńqyrlardy jóndeýge dereý kirisý;
- aınalmaly joldardaǵy shańdy basý úshin sý sebýdi jáne profıldeýdi turaqty negizde júrgizý;
- jóndeý jumystary júrip jatqan ýchaskeniń boıyna sıgnaldyq jalaýshalar men jol belgileriniń qajetti sanyn ornatý. Barlyq ýaqytsha belgiler sary tústi bolýy tıis;
- árbir Lotta jol qozǵalysy qaýipsizdigi jónindegi ınjener laýazymy shtatyn engizý qajet;
- jumys barysynda qyzmetkerlerde mindetti túrde arnaıy kıimniń jáne sıgnaldyq keýdeshelerdiń bolýyn qadaǵalaý;
- túnde qaýipti ýchaskelerde jaryq maıaktaryn mindetti túrde ornatý;
- kólik aǵynyn bólý úshin asfalt-betondy joldyń ústine ýaqytsha jol tańbasyn salýdy qamtamasyz etý;
- jol-qurylys jumystaryn júrgizý kezinde qaýipsizdik tehnıkasyn saqtaý;
- aǵymdaǵy jyldyń 15-shi mamyryna deıin avtojol jabyndysyn jóndeý jáne onyń boıynda qajetti qaýipsiz belgilerin ornatý jumystaryn aıaqtaý qajet.
Aıta ketsek, «Almaty–О́skemen» avtojolynyń osy bóliginen byltyr 1,2 mln. otandyq jáne sheteldik týrıst ótken. Almaty oblysyndaǵy Alakól kóli týrıstik klasterine engen. Aǵymdaǵy jyly avtojoldyń osy bóligi arqyly 1,5-1,8 mln. týrıst júrip ótedi dep kútilýde.
