Kezekten tys ótken HIH sezdiń kún tártibine sáıkes Qazaqstan Respýblıkasynyń Prezıdenti saılaýyna «Nur Otan» partııasynyń atynan úmitker usyný jónindegi másele qaraldy.
Partııalastarynyń aldynda sóılegen sózinde Elbasy Nursultan Nazarbaev aýyr daǵdarys jaǵdaıynda bastalǵan táýelsiz Qazaqstandy qalyptastyrý joly ońaı bolmaǵanyn eske saldy.
– Ekonomıkanyń jappaı kúıreýi halyqtyń basym kópshiligin kúızeliske ushyratty. Kóptegen sarapshylar etnosaralyq shıelenister men qaqtyǵystar bolady dep boljam jasady. Biraq, biz ózimizdiń egemen elimizde beıbitshilik pen kelisim jaǵdaıynda ómir súrýge laıyqty ekenimizdi búkil álemge dáleldedik. Meniń «aldymen ekonomıka, sosyn saıasat» degen negizgi qaǵıdatym durystyǵyn dáleldedi, – dedi «Nur Otan» partııasynyń Tóraǵasy.
Qazaqstannyń Tuńǵysh Prezıdenti durys júrgizilgen saıasattyń arqasynda elimizdiń postkeńestik keńistiktegi qarqyndy damyp kele jatqan memleketke aınalǵanyn aıtty.
«Nur Otan» partııasynyń Tóraǵasy joldardyń qurylysy men qaıta jóndelýiniń zor nátıjelerin atap ótip, Táýelsizdik jyldaryndaǵy qazaqstandyqtardyń tabysynyń ósimine toqtaldy.
– Biz úshin eń qıyn bolǵan jyldarda men myńdaǵan jas qazaqstandyqtardy álemniń úzdik ýnıversıtetterine jiberdim. Búginde ozyq bilim berý júıesin Qazaqstanda qalyptastyramyz. Onyń ózegi Nazarbaev zııatkerlik mektepteri men Nazarbaev Ýnıversıteti bolmaq, – dedi Elbasy.
Nursultan Nazarbaev densaýlyq saqtaý isi men mádenıet salasyndaǵy jetistikterge de toqtaldy.
– Maǵan óz halqymmen birge táýelsiz Qazaqstandy qurý mártebesi buıyrǵanyn maqtan tutamyn. Qıyn zamanǵa qaramastan halqym meniń bastamalaryma árdaıym qoldaý kórsetti. Sonyń arqasynda biz barlyq nátıjelerge qol jetkizdik. Men elimizdiń halqyna rızashylyǵymdy bildiremin, – dedi Qazaqstannyń Tuńǵysh Prezıdenti.
Sonymen qatar, «Nur Otan» partııasynyń Tóraǵasy Qazaqstannyń odan ári tabysty damýyn bizdiń baǵdarymyzdyń sabaqtastyǵy ǵana qamtamasyz etetinin aıtty.
– Tórtinshi ónerkásiptik revolıýsııa talaptaryna sáıkes elimizdi tehnologııalyq jáne ınfraqurylymdyq turǵydan damytýdyń jańa kezeńine qadam bastyq. Sıfrlandyrý jáne ınnovasııany engizý esebinen eńbek ónimdiligi men ekonomıkanyń básekege qabilettiligi artty. Osy aýqymdy jumystardyń bári búkil qazaqstandyqtardyń ál-aýqatyn arttyrýǵa baǵyttalǵan, – dedi Elbasy.
Nursultan Nazarbaev Konstıtýsııa boıynsha ózine bekitilgen ókilettilikterge sáıkes Otanymyzdy órkendetý úshin jumys isteı beretinin aıtty.
– Men tóraǵa bolyp qala beretin Qazaqstan halqy Assambleıasy aıasynda atqaratyn jumys kóp. Qoǵamdyq kelisim men ultymyzdyń birligin nyǵaıtý úshin isimizdi jalǵastyra beremiz. Qaýipsizdik Keńesin basqara otyryp, men ózimniń kópjyldyq tájirıbemdi ishki jáne syrtqy saıasatty anyqtaı otyryp, elimizdi damytýdyń birqatar negizgi máselelerin sheshýge baǵyttaımyn. Men burynǵysynsha eń iri «Nur Otan» saıası partııasynyń Tóraǵasy bolyp qala beremin, – dedi Qazaqstannyń Tuńǵysh Prezıdenti.
Elbasy Nursultan Nazarbaev tańdap alǵan saıası jáne ekonomıkalyq baǵdar sabaqtastyǵynyń saqtalýyna partııa kepil bolýǵa jáne belgilengen mindetterdiń bárin júzege asyrýǵa tıis ekenin aıtty.
– Jańǵyrýdyń tıimdiligin, sonyń ishinde partııanyń «Baqytty otbasy», «Qutty meken», «Aýyl – El besigi» jáne «Halyqqa kómek» jobalaryn júzege asyrý aıasynda árbir qazaqstandyqtyń sezinýine qol jetkizýimiz kerek, – dedi «Nur Otan» partııasynyń Tóraǵasy.
Qazaqstannyń Tuńǵysh Prezıdenti qazaqstandyqtardan óz atyna kóptegen hat kelip jatqanyn aıtyp, qazaqstandyqtardyń dostyǵy men quqyqtarynyń teńdigi ózgermeıtinine senim bildirdi.
Nursultan Nazarbaev Qasym-Jomart Toqaevty elimizdegi joǵary laýazymǵa laıyqty úmitker ekenin aıtyp, onyń Otan aldyndaǵy sińirgen eńbegi men jetken jetistikterine toqtaldy.
– Qasym-Jomart Toqaev menimen birge táýelsizdiktiń alǵashqy jyldarynan bastap qyzmettiń túrli salasynda jumys istedi. Ol – uzaq jyldar Syrtqy ister mınıstrligine jetekshilik etip, Qazaqstannyń syrtqy saıasatyn birge qalyptastyrýǵa atsalysqandardyń biri. Onyń dıplomatııalyq dárejesi shetelde joǵary baǵalanady. Qasym-Jomart Toqaevtyń BUU Bas hatshysynyń orynbasary bolǵanyn jáne tájirıbeli memleket saıasatkeri ekenin jaqsy bilesizder, – dedi Qazaqstannyń Tuńǵysh Prezıdenti.
Sondaı-aq, Elbasy respýblıkalyq qoǵamdyq saılaý shtabynyń jumysyn úılestirýdi tapsyryp, azamattardyń barlyq sanatymen jumys júrgizýdiń qajettiligine nazar aýdardy.
Sońynda Qazaqstannyń Tuńǵysh Prezıdenti qazirgi jaǵdaıda turaqty damyp, ósip-órkendeý úshin halyqtyń birligi bekem bolýy jáne barsha qazaqstandyqtardyń birlese kúsh-jumyldyrýy qajet ekenin atap ótti.
– Biz bul kezeńdi esh qıyndyqsyz eńseretinimizge senimdimin. Bizdiń maqsatymyz – halqymyzdyń ál-aýqatyn arttyrý jáne elimizdi odan ári ilgeriletý. Memleketke qurmet kórsetý, azamattardyń bir-birin syılaýy – turaqtylyqtyń belgisi, – dedi Nursultan Nazarbaev.
