Aldymen Jambyl oblysynyń kıeli oryndaryn aralaǵan saıahatshylar Túrkistan oblysynyń da tabıǵaty men shejireli tarıhymen tanysty.
Báıdibek aýdanyndaǵy Aqmeshit úńgirine kelgen qonaqtar mundaǵy erekshe kóriniske súısindi. Ǵalymdardyń zertteýinshe, Aqmeshit úńgirindegi aýa adamnyń júıkesin tynyshtandyryp, qan qysymyn jaqsartady. Boıdaǵy jaǵymsyz energııany tartyp alady. Belgili sport janashyry, «Qazaqstan barysy» jobasynyń avtory Arman Shoraev ekspedısııaǵa osy úńgirdi kórý úshin arnaıy kelgenin aıtty. «Keremet áser aldym», – deıdi ol. Al tanymal rejısser Aqan Sataev Túrkistan oblysynda fılm túsirýge suranyp turǵan oryndar óte kóp ekenin, bolashaqta osy baǵytta jumys isteýge qarsy emes ekenin sóz etti. О́lketanýshy, «Ońtústik ańyzdary» baǵytynyń avtory Erlan Syzdyqtyń aıtýynsha, saıahatshylardyń alǵan áserleri keremet. Olardy ólkeniń tabıǵaty men ańyzdary qatty qyzyqtyrǵan. Eger suranys bolsa, osy baǵyt boıynsha týrıstik baǵyt jalǵasady. Osy arqyly Túrkistan oblysynyń týrızmi damıdy. 4 avtobýs pen 60-tan astam jeńil kólikke mingen saıahatshylar tabıǵat aıasynda tamaqtanyp, naǵyz kóshpendilerge tán ómirdi sezindi.
Buǵan deıin respýblıka kóleminde 3 ekspedısııa ótse, aýqymy jáne qatysýshylar sany jaǵynan eń úlkeni – osy «Ońtústik ańyzdary».
Aqmeshit úńgirine aıaldaǵan soń saıahatshylar Domalaq ana kesenesine zııarat jasady. Sondaı-aq Shaıandaǵy Appaq Ishan meshitine de at basyn buryp, tarıhymen tanysty.
Marǵulan Seısembaevtyń bastamasymen qurylǵan ekspedısııa quramynda elge tanymal qoǵam qaıratkerleri, zııaly qaýym ókilderi, ólketanýshylar, jýrnalıster, óner qaıratkerleri, kásipkerler men sportshylar jáne ózge de sala ókilderi bar. Saıahatshylar Túrkistan oblysynda týrızm salasynyń bolashaǵy zor ekenin jetkizdi. Elbasynyń «Rýhanı jańǵyrý» maqalasynda da osy salaǵa mán berilgen. Respýblıka boıynsha kıeli jáne týrıstik oryndar sany boıynsha da Túrkistan oblysy aldyńǵy qatarda.
Shejire men ańyzǵa toly óńirge qadam basqan ekspedısııa músheleri erteń oblystaǵy ózge de kıeli oryndardy aralaıdy.
