Kezdesý barysynda taraptar ınvestısııalyq yntymaqtastyqtyń qazirgi ahýaly men perspektıvalaryn talqylady.
– Biz 7 jyl buryn tabysty yntymaqtastyǵymyzdy bastadyq. Búginde sizderdiń kásiporyndaryńyz temirjol salasynda ǵana emes, sondaı-aq mashına jasaý salasynda da jumys istep keledi. Kompanııańyz shyǵaratyn ónim óńir elderinde suranysqa ıe, – dedi Qazaqstannyń Tuńǵysh Prezıdenti.
Áńgimelesý kezinde Nursultan Nazarbaev elimizdiń kólik-tranzıt áleýetiniń artýyna oraı ınfraqurylymdy damytýdyń mańyzdy ekenin atap ótti.
– Qazir ınfraqurylymdyq damý óńirdegi mańyzdy baǵyttardyń biri sanalady. Bul Qytaıdyń «Bir beldeý, bir jol» bastamasyna da baılanysty. Biz temirjol jelilerin saldyq, – dedi Elbasy.
Anrı Pýpar-Lafarj Nursultan Nazarbaevtyń ınvestısııalyq yntymaqtastyqty nyǵaıtý isindegi rólin atap ótip, kezdesýge múmkindik bergeni úshin Qazaqstannyń Tuńǵysh Prezıdentine rızashylyq bildirdi.
– Elektrovoz qurastyrý zaýytynda kóp tehnıka shyǵaryldy. Bul ónim shetel naryǵyna da jetkizilýde. Ázerbaıjanǵa eksporttaýdy bastadyq. Biz qazaqstandyq mamandardyń arqasynda sapaly ónim shyǵarýǵa múmkindik aldyq. Qazir óndirisimizdi keńeıtýdi josparlap otyrmyz. Zaýyt qyzmetkerlerin 500-den 700 qyzmetkerge deıin, sondaı-aq kásiporynnyń ónimdiligin jylyna 100 elektrovozǵa deıin kóbeıtý josparda bar, – dedi «ALSTOM» kompanııasy basqarmasynyń tóraǵasy.
