Kezdesý barysynda ınvestısııalyq yntymaqtastyqty jáne QR Úkimetiniń ınvestorlardy qoldaý ekojúıesin damytý jónindegi jańa tásilderi aıasynda ózara is-qımyldy odan ári arttyrý máseleleri talqylandy.
QR Premer-Mınıstri A. Mamın ekonomıka damýynyń, saýda jáne ınvestısııalar ósiminiń oń qarqynyn atap ótti. 2018 jyly Qazaqstanǵa tikeleı sheteldik ınvestısııalardyń túsimi 15,8% ósip, $24 mlrd qurady. О́tken jyly Qazaqstannyń syrtqy saýda kólemi 20% ósti.
«Qazaqstan Úkimetiniń ınvestısııalardy tartýǵa asa qolaıly jaǵdaılar jasaýǵa ári ınvestorlardyń quqyqtaryn qorǵaýdy kúsheıtýge erekshe kóńil bólýi jáne QR Premer-Mınıstriniń oǵan tikeleı qatysýy – ınvestorlar úshin óte jaqsy belgi», — dedi Amerıka saýda palatasynyń Atqarýshy dırektory D. Bredbıýrı.
Investısııalyq yntymaqtastyq áleýetin atap óte otyryp, dıplomatııalyq mıssııalardyń basshylary Qazaqstanda júrgizilip jatqan ınvestısııalyq ahýaldy jaqsartý jónindegi jumystardy qoldaıtyndaryn jáne tyǵyz yntymaqtastyqty odan ári jalǵastyrýǵa múddeli ekenderin bildirdi. Olardyń pikirinshe, ınvestısııalyq jobalardy iske asyrýmen baılanysty barlyq máselelerdi QR Premer-Mınıstriniń tóraǵalyǵymen Úılestirý keńesi deńgeıinde tikeleı ári erkin talqylaý múmkindigi — ınvestorlar tarapynan senimniń artýynyń mańyzdy faktory.
О́z kezeginde QR Premer-Mınıstriniń birinshi orynbasary – qarjy mınıstri Á. Smaıylov, «Astana» halyqaralyq qarjy ortalyǵynyń basqarýshysy Q. Kelimbetov sheteldik ınvestısııalardy belsendi túrde tartýdyń jańa tásilderine toqtalyp ótti. Investorlarmen belsendi jumys júrgizýdiń aımaqtyq habyna aınalatyn AHQO sátti jumys istep tur. Onyń aýmaǵynda qolaıly jumys isteýge jáne ınvestısııalyq jobalardy iske asyrýǵa barlyq qajetti jaǵdaılar jasalǵan. Bul aǵylshyn quqyǵy qaǵıdalaryna negizdelgen TMD keńistigindegi alǵashqy, biregeı quqyqtyq rejım, táýelsiz sot jáne arbıtraj ortalyǵy.
Kezdesýdi qorytyndylaı kele, QR Premer-Mınıstri A. Mamın ınvestısııalyq ahýaldy odan ári jaqsartyp, sheteldik ınvestorlarǵa jáne Qazaqstanda bıznes júrgizýge qolaıly jaǵdaılar jasaýǵa barlyq kúsh-jigerdiń jumyldyrylatynyn aıtty.
«Biz ózara is-qımylymyzdy jandandyrýǵa múddelimiz. Investısııalar tartý jónindegi jańa kúsheıtilgen sharalar ınvestısııalyq yntymaqtastyqqa eleýli qarqyn bererine senemiz», — dedi A. Mamın.
