2019 jylǵy 24 sáýirde Nur-Sultan qalasynda QRKF Bas keńesiniń otyrysy ótti. Osy otyrysta Kásipodaqtar federasııasy atynan Prezıdenttik saılaýǵa qatysýǵa úmitker usyný máselesi qaraldy.
Eske sala keteıik, keshe QRKF Atqarý komıteti Kásipodaqtar federasııasy Tóraǵasynyń orynbasary Muhtar Tinikeevtiń jáne Batys Qazaqstan oblysy aýmaqtyq kásipodaqtar birlestiginiń tóraǵasy Amangeldi Taspıhovtyń kandıdatýralaryn Prezıdent saılaýyna úmitker bolýǵa maquldap, Bas keńestiń qaraýyna usynǵan bolatyn.
Talqylaý barysynda úmitkerlerdi tyńdaý nátıjesinde, sondaı-aq M.Tinikeevtiń saılaýǵa qatysýdan ózdiginen bas tartýyna oraı, QRKF Bas keńesi Amangeldi Taspıhovtyń kandıdatýrasyn Prezıdenttikke úmitker retinde usyný týraly sheshim qabyldandy.
Ol 1959 jyly 20 qarashada Batys Qazaqstan oblysynda dúnıege kelgen. Lenın atyndaǵy Qazaq polıtehnıkalyq ınstıtýtyn ınjener-mehanık mamandyǵy boıynsha támamdaǵan.
Eńbek jolyn 1982 jyly Almaty aýyr mashına jasaý zaýytynda ınjener-tehnolog bolyp bastaǵan. Túrli jyldary memlekettik organdarda basshylyq laýazymdarda qyzmet atqarǵan, bıznes qurylymdarynda jumys istegen.
Batys Qazaqstan oblysy maslıhatynyń depýtaty, sondaı-aq Senat jáne Májilis depýtaty bolyp saılanǵan.
2019 jyldan beri Batys Qazaqstan oblysy aýmaqtyq kásipodaqtar birlestiginiń tóraǵasy qyzmetin atqarady.
«Qurmet» (2005) ordenimen, medaldarmen marapattalǵan.
Úılengen, eki balasy bar.
