Keńeske Prezıdent Ákimshiliginiń Basshysy B.Saǵyntaev, Prezıdenttiń kómekshisi T.Súleımenov, Premer-Mınıstrdiń birinshi orynbasary – Qarjy mınıstri Á.Smaıylov, Ulttyq bank tóraǵasy E.Dosaev, Ulttyq ekonomıka mınıstri R.Dálenov qatysty.
Memleket basshysy qarjy ahýalyna baılanysty ınflıasııa deńgeıin tómendetý jónindegi qabyldanǵan sharalardyń oń yqpalyn atap ótti.
– Búgin biz Ulttyq banktiń byltyrǵy jumysy týraly esepti tyńdaımyz. Elimizdegi makroekonomıkalyq jaǵdaı meılinshe turaqty. 2018 jyly ishki jalpy ónimniń ósimi 4,1% deńgeıdi kórsetti. Inflıasııa belgilengen kórsetkishten aspaı 5,3% qurady. Úkimet pen Ulttyq bank júrgizilip jatqan makroekonomıkalyq saıasattyń sabaqtastyǵy týraly birlesken málimdeme qabyldady, – dedi Qasym-Jomart Toqaev.
Ulttyq bank tóraǵasy Qazaqstan Prezıdentine berilgen tapsyrmalardyń oryndalý barysy jóninde baıandady.
– Ulttyq banktiń jaqynda shyǵarǵan sheshiminiń qorytyndysy boıynsha bazalyq mólsherleme 9% tómendedi. Bul tartylǵan qarjynyń qunyn tómendetý úshin qosymsha múmkindik beredi jáne keleshekte kásipkerlik, ásirese, shaǵyn bıznes úshin nesıe mólsherlemesine yqpal etedi dep sanaımyz. Sizdiń Mańǵystaý oblysyna jumys saparyńyzdyń barysynda bergen tapsyrmańyzdy oryndaý aıasynda biz Úkimetpen birlesip, alǵashqy qadamdardy jasadyq, – dep málimdedi Erbolat Dosaev.
Memleket basshysyna teńgeniń aıyrbastaý baǵamynyń ahýaly men oǵan syrtqy jáne ishki faktorlardyń áseri, sondaı-aq, elimizdiń syrtqy qaryzynyń azaıǵany jáne shetelden tartylǵan ınvestısııa kóleminiń artqany jóninde málimet berildi.
Qasym-Jomart Toqaev bankterdiń aktıvteriniń sapasyna baǵalaý júrgizýdiń jáne «7-20-25» baǵdarlamasyn júzege asyrý jumystaryn jalǵastyrýdyń qajettigin aıtty.
Keńes qorytyndysy boıynsha Qazaqstan Prezıdenti usynylǵan esepti quptap, qarjy sektoryn damytýǵa qatysty birqatar naqty tapsyrma berdi.
