Memleket basshysyna elimizdegi «Eńbek» memlekettik baǵdarlamasynyń júzege asyrylý barysy, az qamtylǵan kópbalaly otbasylarǵa kórsetilip jatqan kómekter boıynsha jáne jańa jumys oryndaryn ashý arqyly jumyssyzdyqpen kúres týraly baıandaldy.
Mınıstr kásip ashýǵa granttar, shaǵyn nesıeler beriletinin, mamandyǵy joq azamattardy qaıta oqytyp, jastar praktıkasy men qoǵamdyq jumystarǵa tartý arqyly jylyna orta eseppen 370 myń jańa jumys ornyn ashý josparlanǵany týraly málimet berdi. B.Saparbaevtyń aıtýynsha, aldaǵy úsh jylda keminde 1 mln. 100 myń jumys ornyn ashý kózdelgen. Sonymen qatar, elimizde múmkindigi shekteýli azamattardy qorǵaý jónindegi ulttyq jospardyń daıyndalyp jatqandyǵyn, ishki jáne syrtqy kóshi-qon saıasatynyń júzege asyrylýyn jetkizdi.
Qasym-Jomart Toqaev halyqty áleýmettik qorǵaýǵa baǵyttalǵan memlekettik baǵdarlamanyń sapaly júzege asyrylýy mańyzdy ekenine toqtalyp, ásirese az qamtylǵan kópbalaly otbasylardyń áleýmettik jaǵdaıyn jaqsartyp, jumyssyzdyq deńgeıin 4,5%-ten asyrmaý qajettigin tapsyrdy. Sonymen qatar, elimizdegi múmkindigi shekteýli azamattardy qoldaýdyń mańyzdylyǵyn aıtty.
Memleket basshysy áleýmettik baǵdarlamalardyń ýaqytyly jáne sapaly atqarylýyna baılanysty birqatar naqty tapsyrmalar berdi.
