Eń aldymen jergilikti jýrnalısterge arnalǵan medıa saýattylyq pen sıfrlik jýrnalıstıka taqyryptaryna, sonymen birge, energııa tıimdililigin arttyrý, JEK máselelerin baıandaýǵa qatysty jumystyń erekshelikterine arnalǵan medıa-trenıng uıymdastyryldy.
Medıa-trenıngtiń maqsaty – Qazaqstan Respýblıkasyndaǵy energııa únemdeý saıasatyn júzege asyrý jáne JEK máseleleri boıynsha BAQ ókilderiniń habardarlyǵyn arttyrý. Medıa-trenıng barysynda Qazaqstandaǵy BUUDB is-áreketi, ári «jasyl ekonomıkany» damytý, klımat ózgerýi, energetıkalyq turǵydan tıimdi tehnologııalardy qoldaný, sonymen qatar, JEK salasyndaǵy jobalardy iske asyrý tájirıbeleri jaıly keń kólemdi málimet aldy. Eń basty aýdıtorııa – teledıdar arnalarynyń, baspa jáne onlaın basylymdarynyń jýrnalısteri men blogerler.
Budan basqa, «Jasyl ekonomıkaǵa» ótýdiń asa mańyzdy baǵyttary retinde qala sharýashylyǵynda energııa tıimdiligin arttyrý jáne jańartylatyn energııa kózderi nysandaryn engizý» taqyrybynda semınar-konferensııa ótti.
Konferensııanyń maqsaty – qalanyń kommýnaldyq sharýashylyq salasynda energııa únemdeý tehnologııalaryn, ári jańartylatyn energııa kózderin endirýge kóshýine arnalǵan naqty qadamdardy jáne uıymdastyrýshylyq qarjylyq quraldardy kórsetý.
Shara barysynda iske asyrylǵan, ári josparlanyp jatqan energııa tıimdi jobalardyń nátıjeleri tanystyryldy. Sondaı-aq, sarapshy-mamandar yqtımal bógetter men olardy eńserý joldaryn talqylap, energııa únemdeıtin tehnologııalardy jappaı endirýge arnalǵan is-áreketter josparyn qalyptastyrý múmkindigine ıe boldy.
Semınarǵa Qazaqstan Respýblıkasy Indýstrııa jáne ınfraqurylymdy damytý, energetıka mınıstrligi, BUUDB sarapshy-mamandary, aýdan, qala ákimdikteri mamandary, kommýnaldyq kásiporyndar, basqarýshy kompanııalardyń ókilderi, jergilikti ınjınırıngtik kompanııalar, energetıkalyq turǵydan tıimdi tehnologııalardy óndirýshiler, qoǵamdyq uıymdar jáne qarjylyq mekemeleri qatysty.
