Búgin – jartylaı fınal

Jartylaı fınalda Qazaqstan­nyń úsh birdeı óreni Úndistannyń ókilderimen kúsh synasady. Iá, kezinde biz olardy «qalpaqpen uryp alatyndaı» dárejede edik. Tipten, eń qarýly degen boks­shylardyń ózin kózge de ilmeı­tinbiz. Biraq qazir bári ózger­gen. Úndiler tek bizder ǵana emes, jeńispen órilgen mol dástúri bar ózge de elder úshin de asa qaýipti qarsylasqa aınalyp otyr. Alysqa barmaı-aq, osy jarysta 57 kılo salmaqtaǵy úndistandyq Kavınder Sıngh Bıshttiń álem chempıony degen dardaı ataǵy bar qazaqtyń uly Qaırat Erálıevti san soqtyryp ketkenin aıtsaq ta jetkilikti. Ol az deseńiz, Amıt jaıynda áńgimeleıik. Esimi kópshilikke beımálim bul boks­shy О́zbekstannyń maqtanyshy, Rıo Olımpıadasynyń jeńimpazy ári Vel Barker kýbogynyń ıegeri, álem chempıonaty men Azııa oıyn­darynyń kúmis júldegeri, eki dúrkin qurlyq chempıony Hasan­boı Dýsmatovtyń ózin jolynan yǵystyrdy. Osy derek­terden-aq, búgingi tańda Úndistan boksy qandaı deńgeıde ekenin anyq ańǵarýǵa bolady.

Sonymen, 49 kılo salmaqtaǵy Temirtas Júsipov Dıpakpen qolǵap túıistiredi. 60 kılo sal­maqtaǵy Zákir Safıýllın Shıva Thapamen kúsh synasady. Birden aıta keteıik, ol osal boksshy emes. Azııa chempıonattarynda Thapa birneshe márte atoı salǵan (2013 jyly – altyn, 2015 jyly – kúmis, 2017 jyly – kúmis). +91 kılo salmaqtaǵy Qamshybek Qońqabaev 2015 jylǵy Azııa birinshiliginiń qola júldegeri Satısh Kumarmen aıqasady.

64 kılo salmaqtaǵy Sanatáli Tóltaev tájikstandyq Bahodır Ýsmo­nov­pen kezdesse, 75 kılo salmaqtaǵy Tursynbaı Qulah­met túrikmenstandyq Nur­­sahat Pazzyev­pen sheberlik baıqa­sady. 85 kılo salmaqtaǵy Bek Nur­maǵan­bettiń qarsylasy – qyrǵy­z eli­niń ókili Erkin Ádilbekuly. Al 91 kılo salmaqtaǵy Vasılıı Levıt Ońt­ústik Koreıanyń oǵlany Kım Hen Kıýmen judyryq­tasady.

Bul kúnderi Taılandtyń astanasynda Qazaqstannyń erler quramasy táýir óner kórsetip jatsa, áıelder komandasynyń qarqyny kóńil kónshiterlik emes. Erekshe senim artqan byl­ǵary qol­ǵap sheberlerimizdiń birazy bas­tapqy básekelerde súrin­di. Qazir jarys jolynda burym­dylar­dyń tórteýi ǵana qaldy. Jarty­laı fınalda olar myna boks­shy­larmen kezdesedi: 64 kılo: Mılana Safronova – Dan Dý (Qytaı), 69 kılo: Darıǵa Sháki­mova – Nıen Chın Chen (Qytaı), 81kılo: Farıza Sholtaı – Pýdja Ranı (Úndistan) jáne 91 kılo: Lázzat Kúngeıbaeva – Sıaolı Iаng (Qytaı).