Aımaq basshysy Turǵyn úı qurylys jınaq banki basqarma tóraıymy Lázzat Ibragımova, bank departamentiniń dırektory Rınat Taltýsov jáne osy AQ Aqtóbe oblystyq fılıaly dırektory Jedelbek Mýrzagaleevpen birge osy jyldyń birinshi mamyrynan bastap júzege asqaly jatqan «Áskerı baspana» jańa baǵdarlamasyn talqylady. Iаǵnı, bul baǵdarlama áskerı qyzmetkerlerge arnalǵan. Oblys ákimi turǵyndardy baspanamen qamtý úshin barlyq múmkindikterdi qarastyrý qajettigin aıtty.
Qabyldaýdan soń, oblys ákimi «Nur Aqtóbe» móltek aýdanynda ótken páter kiltin tabystaý saltanatty sharasyna qatysty. Aımaq basshysy «Nurly jer» baǵdarlamasy boıynsha 11 aqtóbelik azamatqa páter kiltin tabystady.
«Baspanaly bolǵan azamattardy qýanyshty sátterimen shyn júrekten quttyqtaımyn. Elimizde turǵyndardyń páterli bolýy úshin túrli memlekettik baǵdarlamalar júzege asyp keledi. Otbasylaryńyz tek berekege toly bolsyn», - dedi oblys ákimi óz quttyqtaýynda.
Baǵdarlama sheńberinde balalar úıiniń túlekteri men bıýdjettik uıym qyzmetkerleri baspanaǵa qol jetkizýde. Jańa qonysqa ıe bolǵannyń biri 23 jasar Bolat Shúkirov oblys basshysyna qoldaý kórsetkeni úshin alǵysyn bildirdi.
Olardyń kóbisiniń jumys tájirıbesi men tabysy az bolǵandyqtan, jalǵa berilgen páterlerdi aldaǵy ýaqytta satyp alý múmkindigi usynyldy. Jaldamaly páterdi paıdalana otyryp, memlekettik baǵdarlamaǵa qatysýshy 6 jyl ishinde Turǵyn úı qurylys jınaq bankindegi óz depozıtinde páter baǵasynyń 50 paıyzyn jınaýy tıis. Osyǵan sáıkes, ol aı saıyn shotyna ortasha eseppen 35 000 teńgeden salyp turýy tıis. Jınaqtaý merzimi aıaqtalǵannan soń, bank qalǵan 50 paıyzyn nesıege jyldyq 4,2 paıyz mólsherlememen beredi.
Aldaǵy ýaqytta balalar úıiniń 20 túlegi jańa baspanaǵa qol jetkizedi dep kútilýde. Páter kilti tabystalǵannan soń, jańa qonys ıeleri men shaqyrylǵan qonaqtar úı aýlasyna aǵash kóshetterin otyrǵyzdy.
