Semınar jumysyna astananyń 50 memlekettik balabaqshasynyń jetekshileri men jas mamandary qatysty. Sharanyń negizgi maqsaty – mektepke deıingi uıymdarda robototehnıka týraly bilim berý aıasyndaǵy tájirıbemen almasý.
№54 balabaqshanyń orynbasary Zarııakúl Imanbaeva qonaqtarǵa mýlt-stýdııany, robototehnıka jáne art-terapııa kabınetterin kórsetti.
«Álemniń úzdik sarapshylarynyń aıtýynsha, 2025 jylǵa qaraı robottardyń qyzmet kórsetýi jáne basqarý eń qajetti mamandyq bolady. Bizdiń jas urpaq zamanǵa saı bolýy úshin olardy jastaıynan jańa daǵdylardy úırenýge beıimdeý kerek. Bizdiń balabaqshada bul baǵytta bilim berý 3-4 jastan bastalady. Robototehnıka túrli elementterdi qoldaný arqyly jobalaý men jasap shyǵarýǵa daǵdylandyrady. Bala robotty modeldeýdi úırenedi, qosymshanyń maqsatyn anyqtaıdy, baǵdarlamany qurastyrady jáne ony basqarýdy úırenedi. Árıne, jumys kezinde balanyń jasy eskeriledi», – dedi ol.
Sonymen qatar, onyń aıtýynsha, qurastyrý balanyń usaq motorıkasyn damytýǵa, sol arqyly sóıleý qabiletiniń damýyna, ońaı beıimdelýine múmkindik beredi.
«Balalardyń qyzyǵýshylyǵy óte joǵary, úıirmege 140 shaqty bala qatysady. Sonymen qatar, balabaqshadaǵy basqa balalar da osy jınaqtardy paıdalaný múmkindigine ıe. Olardyń tárbıeshileri óz sabaqtarynda qurastyrýdy paıdalana alady», – dep qorytyndylady ol.
