«Bul - elimizdiń bedeli joǵary MHKF konkýrsynyń tarıhynda alǵan tuńǵysh marapaty! Kartına QR Mádenıet jáne sport mınıstrligi tapsyrysymen «Qazaqfılm» stýdııasynda túsirilgen. Fılm ssenarıi Danııar Súgiralınovtyń «Kırpıchı 2.0» shyǵarmasynyń negizinde jazylǵan. «Úzdik fılm» nomınasııasyndaǵy «Altyn Áýlıe Georgııdi» Sháripovke qazylar alqasynyń tóraǵasy, ataqty rejıssıor Kım Kı Dýk tapsyrdy», dep jazdy mınıstr.
Arystanbek Muhamedıuly óz jazbasynda Farhat Sháripovty quttyqtady. Áleýmettik drama qyryq jasqa kelgen, orta jas kúızelisin bastan keship júrgen bank qyzmetkeri Qanattyń ómirbaıanyn baıandaıdy. Onyń esh armany da, ómirden kúteri de joq. Alaıda bir kúni Qanat tulǵalyq qalyptasý, kóshbasshylyq qasıetterdi damytý trenıngine tap bolady.
«Fılmniń jaryqqa shyǵýyna yqpal etken barsha adamǵa alǵys aıtamyn. Aldymen otbasyma myń alǵys. Sol sebepti bul jeńisimdi ákeme arnaımyn. Al festıval uıymdastyrýshylary men kórermenderine kóp rahmet», - dedi MHKF laýreaty Farhat Sháripov óz oıymen bólisti.
«Trenıng lıchnostnogo rosta» fılminiń álemdik tusaýkeseri 23-shi Pýsan Halyqaralyq kınofestıvalinde ótken. О́tken jyly fılm 14-shi Halyqaralyq Sháken Aımanov kınofestıvalinde Qazylar alqasynyń arnaıy júldesi men Netpak júldesin ıelengen bolatyn.
Halyqaralyq Máskeý kınofestıvali - álemdegi eń tarıhı festıvalderdiń biri. Onyń negizi 1935 jyly qalanyp, sol jyly Sergeı Eızenshteın qazylar alqasyn basqarǵan. Sońǵy 20 jyl ishinde festıvaldiń qazylar alqasyn álemniń eń beldi kınogerleri basqardy, olardyń qatarynda: Rıchard Gır, Teo Angelopýlos, Alan Parker, Gleb Panfılov, Jan-Jak Anno, Lıýk Besson, Mohsen Mahmalbaf bar. MHKF-niń baǵdarlama dırektory - mádenıettanýshy Kırıll Razlogov, irikteý komıssııasyn reseılik kınosynshy Andreı Plahov basqarady. MHKF prezıdenti qyzmetin biraz jyldan beri reseılik rejısser, akter, Reseı Federasııasynyń Halyq ártisi Nıkıta Mıhalkov atqaryp keledi. Bıyl festıvaldiń qazylar alqasyna tanymal ońtústik Koreıa rejısseri Kım Kı Dýk tóraǵalyq etti.
