Eksport úshin tosqaýyldar - qazaqstandyq dıplomatııanyń basty nazarynda

Syrtqy ister mınıstrligine eksportty ilgeriletý salasynda júktelgen ókilettikter otandyq óńdelgen ónimderdiń syrtqy naryqtarǵa turaqty jetkizilýin arttyrý máselelerin sheshýde dıplomatııalyq qyzmettiń belsendi qatysýyn bildiredi. Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev Úkimetke 2019 jyly shıkizattyq emes eksport kólemin 24,7 mlrd. AQSh dollaryna deıin arttyrý mindetin qoıǵany belgili.

Osy maqsattarda, eń aldymen, Syrtqy ister mınıstrliginiń eksportty ilgeriletý úderisine qatysatyn basqa memlekettik organdarmen jáne kvazımemlekettik qurylymdarmen fýnksııalardy aıqyn bóletin ózara árekettesý algorıtmi quryldy.

IIDM eksporttyq saıasatty aıqyndaıdy jáne ony óńdeý ónerkásibi salasynda júzege asyrady; AShM – azyq-túlik ónerkásibi salasynda; UEM syrtqy saýda qyzmetin retteý jáne damytý salasyndaǵy memlekettik saıasatty ázirleıdi; «Atameken» QR UKP servıstik qoldaý kórsetedi; «KazakhExport» ESK» AQ eksporttaýshylarǵa qarjylyq jáne saqtandyrý qyzmetterin usynady. Qazaqstandyq ındýstrııa jáne eksporttyq ortalyǵy (Qazaqstandyq ındýstrııany damytý ınstıtýty» bazasynda) otandyq eksporttaýshylar úshin «Bir tereze» retinde usynylady. Eksporttaýshylarǵa qajet qujattamany rásimdeý men kelisý joǵaryda atalǵan jáne basqa salalyq qurylymdardyń quzyretine kiredi.

Syrtqy ister mınıstrligi qandaı da bir ruqsattar berý prosesine qatyspasa da, óziniń ereksheligine baılanysty basqa mańyzdy baǵytta - eksportty damytýdyń syrtqy aspektilerine basty nazar aýdarady.

Syrtqy saıası vedomstvo shet memleketterdiń bılik ókilderimen qazaqstandyq eksportqa tarıftik jáne tarıftik emes tosqaýyldardy azaıtý; shet elderde ońtaıly kólik marshrýttaryn pysyqtaý; taýarlardy ımporttaýǵa ruqsat etilgen tizimderge engizý; saýda salasynda, onyń ishinde, erkin saýda aımaqtary boıynsha kelisimder jasasý; qazaqstandyq bıznestiń halyqaralyq kórmeler men jármeńkelerge qatysýy úshin qolaıly jaǵdaılar jasaý sııaqty (mysalǵa, elimizdiń Orynbor q. (2019 jylǵy qazan) «Qazaqstanda jasalǵan» 2-shi saýda-ónerkásiptik kórmesine jáne ú.j. qarashasynda Shanhaı q. ótetin 2-shi Qytaı halyqaralyq ımporttyq kórmesine daıyndyq jumystary júrgizilýde) jáne t.b. mańyzdy máseleler boıynsha kelissózderdi ótkizýge tikeleı qatysady.

Bul jumystyń tıimdiligi kóbinese eksportty qoldaý salasynda basqa ulttyq oıynshylarmen birge turaqty túrde «saǵatty salystyrýǵa» baılanysty. Osy maqsatta Syrtqy ister mınıstrligi sheńberinde  shıkizattyq emes eksportty ilgeriletý máselesi boıynsha praktıkalyq sharalardy ázirleýge jáne qajetti aqparatty almasýǵa baǵyttalǵan arnaıy Vedomstvoaralyq jumys toby qurylǵan.

Qazaqstandyq eksportqa baǵyttalǵan jeke sektormen tikeleı ózara árekettesý SIM quraldaryndaǵy jańa element  bolyp tabylady. Kásiporyndar belgili bir elderde bıznesti júrgizý týraly qajetti aqparatty usynýǵa, sheteldik seriktestermen kezdesýlerdi uıymdastyrýǵa, satyp alýshylardy izdestirýge jáne t.b. ótinish bildiredi. 2019 jyldyń basynan bastap SIM aýyl sharýashylyǵy, mashına jasaý, qorǵanys-ónerkásip kesheni, jeńil ónerkásip, farmasevtıka jáne qurylys qyzmetterin kórsetýmen aınalysatyn birqatar kompanııalar men assosıasııalardyń ótinishterin pysyqtady.