Sıpattamasy jóninen biregeı bolyp tanylǵan transformator zaýyty Shymkent qalasynyń «Tassaı» óndiris aýmaǵynda 12 gektar jerge ornalasqan. Zaýyt - kerneýi 110kV-dan 500kV-ǵa deıingi transformator shyǵaratyn Ortalyq Azııadaǵy birden-bir óndiris orny.
Zaýyttyń ashylý rásimine Shymkent qalasy ákiminiń orynbasary Danat Jýmın, «Asia Trafo» zaýytynyń bas dırektory Serǵazy Kúntýarov, sondaı-aq sheteldik qonaqtar, QR damý ınstıtýtynyń qyzmetkerleri, «Atameken» UО́P, mınıstrlikter, salalyq komıtetter basshylary, biregeı assosııasııa, jergilikti atqarýshy organdardyń, ulttyq kompanııalardyń, kommýnaldy kásiporyndardyń jáne TMD elderiniń irgeli tutynýshy uıymdarynyń ókilderi qatysty.
«Asia Trafo» zaýytynyń bas dırektory Serǵazy Kúntýarov jınalǵandarǵa ınvestıtsııalyq jobanyń tarıhy, tehnologııasy, áleýeti, ónimniń ereksheligi jáne eksporttyq múmkindigi jóninde áńgimeledi. Joba «Qazaqstannyń Damý Banki» AQ-y jáne «BRK-Lızıng» AQ-ynyń qarjylaı qoldaýymen júzege asyrylady. Joba jetekshisi Erkebulan Ilıasovtyń aıtýynsha, kásiporyn kerneýliginiń aýqymdylyǵy 110kV-dan 500kV-ǵa deıin energııa óndiretin joǵary sapaly qondyrǵylardy jobalap, shyǵarýmen aınalysady. Aıta keterligi, búginge deıin Qazaqstanda osyndaı qýatty elektroenergetıkalyq qondyrǵy shyǵarý qolǵa alynbaǵan.
– Zaýytqa otandyq qurylys materıaldary paıdalanyldy. Tek zaýyt ishindegi arnaıy qondyrǵylar Ýkraınadan jáne t.b. elderden ákelindi. Kásiporyn Qazaqstandaǵy elektrotehnıkalyq qondyrǵy shyǵaratyn «Alageum Electric» quramyna jatady. Bul joǵary tehnologııalyq zaýyttyń qurylysy 2017 jyly bastaldy. Alǵashqy kúnderdiń ózinde-aq energetıkter bul jobany Qazaqstan aýmaǵyndaǵy eń ınnovasııaly zaýyt dep ataı bastaǵan bolatyn. Kásiporynnyń ónimi óziniń biregeı patenttelgen tehnologııasy boıynsha óndiriledi, – dedi joba jetekshisi Erkebulan Ilıasov.
Endi «Asia Trafo» zaýytynyń ashylýy Qazaqstanmen qosa úshinshi megapolıstiń damýyna da eleýli úles qosady. Kásiporynnyń ónimderin TMD elderiniń naryǵyna, ıaǵnı Reseı, О́zbekstan, Qyrǵyzstan memleketterine, sondaı-aq Iran, Aýǵanstan, Pákistanǵa shyǵarý josparlanyp otyr.
Aıta ketý kerek, «Alageum Electric» – Qazaqstandaǵy irgeli elektrotehnıkalyq kompanııasy. Quramynda elektroenergetıka, elektromashına qurylysy jáne qurylys salasyn júrgizetin 30-dan astam kásiporyny men zaýyttary bar. Olardyń qatarynda Kentaý qalasyndaǵy «Kentaý transformator» zaýyty jáne «Elektromontaj» AQ, «Elektr buıymdaryn qurastyrý zaýyty» bar. Bul kásiporyndar 10 arnaýly qurastyrý basqarmasyn biriktirip, nebir kúrdeli elektro qondyrǵylaryn qurastyrady.
