Úkimette «Aýyl – El besigi» jobasyn iske asyrýdyń tásilderi maquldandy

Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda «Aýyl – El besigi» jobasyn júzege asyrý arqyly aýyldardyń áleýmettik ınfraqurylymyn jańǵyrtý mindetin qoıdy.

Perspektıvalyq aýyldardy anyqtaý boıynsha atqarylyp jatqan jumystar týraly QR Premer-Mınıstriniń orynbasary J. Qasymbek baıandady. Joba aýyldaǵy turmys jaǵdaıyn jaqsartýǵa, aýyl aýmaqtarynyń áleýmettik ortasyn jańǵyrtýǵa, olardy óńirlik standarttarǵa deıin jetkizýge baǵyttalǵan.

2019 jyly oblystardyń ákimdikteri 454 is-shara ótkizý josparlanǵan aýdan ortalyqtary qatarynan 52 aýyldyq eldi mekendi iriktep aldy. Tańdap alynǵan aýyldardyń perspektıvalary, jobalardy iske asyrý belgileri men josparlary týraly Almaty oblysynyń ákimi A. Batalov, Qostanaı oblysynyń ákimi A. Muhambetov baıandady, bul óńirlerde jobalardy jergilikti bıýdjetten birlesip qarjylandyrýdyń joǵary kórsetkishteri belgilengen. Jobany odan ári iske asyrý máseleleri boıynsha «Nur Otan» partııasynyń hatshysy F. Qýanǵanov, QR eńbek jáne halyqty áleýmettik qorǵaý mınıstri B. Saparbaev usynystaryn jetkizdi.  

QR Úkimetiniń basshysy baıandamalardy tyńdaǵannan keıin, 2025 jylǵa deıin «Aýyl – El besigi» jobasymen 6,1 mln turǵyny bar 2 myńǵa jýyq eldi meken nemese barlyq aýyl turǵyndarynyń 80% qamtylatynyn atap ótti. Aýyldyq eldi mekenderdi jańǵyrtý maqsatynda áleýmettik jáne ınjenerlik ınfraqurylymmen qamtamasyz etýdi kózdeıtin óńirlik standarttar ázirlengen.

«Kishi ýrbanızasııa – aýyldardy jańǵyrtýǵa jáne turǵyndardyń turmys sapasyn arttyrýǵa múmkindik jasaıdy», — dep Asqar Mamın, jobany iske asyrýdyń maquldanǵan tásilderin tıimdi oryndaýdy, jobany ýaqytyly qarjylandyrý úshin tıisti normatıvtik aktilerdi pysyqtaýdy tapsyrdy.  

Ákimdikter «Aýyl – El besigi» jobasyn jergilikti bıýdjetten birlesip qarjylandyrýdy 20% deıin arttyrý múmkindigin qaraýy tiıs, sonymen qatar, bıznestiń áleýmettik jaýapkershiligi aıasynda aýyl ınfraqurylymyn jańǵyrtýǵa qarajat tartý máselesin iri kásiporyndarmen birlesip pysyqtap, týǵan aýyldaryn kórkeıtý boıynsha mesenattarmen jumys júrgizý qajet.

Budan ózge, árbir óńirge «Jol kartasyn» jasaý tapsyryldy, onda iske asyrý merzimderi men jaýapty adamdar naqty kórsetilýi kerek.

«Áleýmettik ınfraqurylym obektilerin – mektepter, balabaqshalar, densaýlyq saqtaý oryndaryn jóndeý, eldi mekenderdiń ishindegi joldardy jóndeý jumystaryn osy jyldyń qyrkúıegine deıin aıaqtaý qajet», — dedi QR Premer-Mınıstri Asqar Mamın.