Ulttyq sportymyzdy damytý maqsatyndaǵy «Túrkistan barysy» týrnıriniń ashylý saltanatynda Shardara aýdanynyń ákimi Bolatbek Qystaýov pen oblystyq dene shynyqtyrý jáne sport basqarmasynyń basshysy Polat Qyryqbaev quttyqtaý sóz sóılep, palýandarǵa sáttilik tiledi. О́ńirdegi qazaq kúresiniń aqsaqaly sanalatyn belgili sportshy, «Qazaqstan Respýblıkasynyń eńbek sińirgen jattyqtyrýshysy» Baqyt Jańbyrbaev boz kilemge shyǵatyn palýandarǵa aq batasyn berdi.
Týrnırde aýdandyq jáne qalalyq irikteýlerde fınalǵa shyqqan 32 balýan baq synady. Joǵary deńgeıde uıymdastyrylǵan týrnırde árbir balýan oblys deńgeıinde barys atanýǵa baryn saldy. Degenmen, oblystaǵy kileń «sen tur, men ataıyn» deıtin balýandardyń arasynan baby men baǵy kelisken túrkistandyq Beıbarys Ábdiǵalı bas júldeni jeńip alyp, «Túrkistan barysy» ataǵyn ıemdendi. Týrnır jeńimpazyn arnaıy belbeý, kýbok jáne dıplommen marapattaǵan oblystyq dene shynyqtyrý jáne sport basqarmasynyń basshysy Polat Qyryqbaev shardaralyq sport janashyrlarynyń demeýshiligimen alynǵan temir tulpardyń kiltin saltanatty jaǵdaıda tapsyrdy. Sondaı-aq, týrnırde II oryndy ıelengen Kentaý qalasynyń palýany Darhan Jamalhanǵa 300000 teńgeniń, III oryn ıelengen otyrarlyq Sabyrjan Ábildaulyna 100000 teńgeniń sertıfıkaty tabys etildi. Al irikteý baıqaýynda sheber qımyldarymen kózge túsken saryaǵashtyq Muhtar Ábdimálik «Kórermen kózaıymy», báıdibektik Ernazar Sirgebaı «Jeńiske degen jigeri úshin» nomınasııalarymen marapattaldy. Týrnırge qatysqan barlyq balýandarǵa estelik syılyqtar tabys etildi. «Túrkistan barysy» ataǵyn ıelengen Beıbarys Ábdiǵalı men II oryndy enshilegen Darhan Jamalhan endi respýblıkalyq «Qazaq barysy» týrnırinde oblys namysyn qorǵaıtyn bolady.
