Bılik ókilderiniń málimetinshe, olar naqty emes ári qoǵamdy jańylystyrýy múmkin aqparat taratty degen kúdikke ilingen. Mundaı materıaldar qoǵamdyq pikirdi qozdyryp, qaýesetterdiń taralýyna sebep bolýy múmkin ekeni aıtyldy.
Bılik sondaı-aq ushqyshsyz ushý apparattarynyń shabýyldaryna qatysty kadrlardy túsirýge jáne jarııalaýǵa Birikken Arab Ámirlikteri aýmaǵynda tyıym salynǵanyn eskertti. Mundaı áreketter el qaýipsizdigine jáne áskerı operasııalardyń júrgizilýine keri áser etýi múmkin.
Buǵan deıin Dýbaı qalasynda da osyndaı áreketter úshin 21 adam ustalǵan. Olar Irannyń BAÁ aýmaǵyna jasaǵan soqqylaryna qatysty jalǵan aqparat pen arandatýshylyq materıaldar taratty dep aıyptalǵan.
Sonymen qatar Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı qalǵan. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Buǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
