Al bala týǵanda beriletin járdemaqyny 2026 jyldyń basynan bastap respýblıkalyq bıýdjetten barlyǵy 10,1 mlrd teńge somaǵa 50,9 myń adam qamtyldy, onyń ishinde aqpan aıynda 4,5 mlrd teńge somasyna 22,4 myń adam aldy. Bul járdemaqyǵa bala týǵan, asyrap alǵan, sondaı-aq qamqorlyqqa alǵan balalary bar elimizdiń azamattary, qandastar, sondaı-aq Qazaqstanda turaqty turatyn sheteldikter úmitker bola alady.
Balaǵa kútim jasaıtyn adam mindetti áleýmettik saqtandyrý júıesine qatysýshy bolyp tabylmaǵan jaǵdaıda týǵan, asyrap alǵan, sondaı-aq qorǵanshylyqqa alǵan balalary bar, eger olar basqa ata-ananyń otbasynda eskerilmese, ógeı balalary bar adamdardyń (otbasylardyń) bala kútimine baılanysty járdemaqy alýǵa quqyǵy bar. Esepti kezeńde 1,5 jasqa tolǵanǵa deıin bala kútimi boıynsha járdemaqymen 8,3 mlrd teńge somasynda orta eseppen 129,8 myń adam qamtyldy, onyń ishinde aqpan aıynda 4,2 mlrd teńge somasyna 129,5 myń adam aldy.
Bala týýyna jáne bala kútimine arnalǵan memlekettik járdemaqylardyń mólsheri respýblıkalyq bıýdjet týraly zańmen tıisti qarjy jylyna bekitilgen aılyq eseptik kórsetkishke (budan ári – AEK) baılanysty belgilenedi. 2026 jyldyń basynan bastap memlekettik járdemaqylardyń mólsheri 10%-ǵa ındekstelgen.
Bala týýyna arnalǵan járdemaqy mólsheri:
- birinshi, ekinshi, úshinshi balaǵa – 38,0 AEK nemese 164 350 teńge;
- tórtinshi jáne odan keıingi balalarǵa – 63,0 AEK nemese 272 475 teńge.
Bala 1,5 jasqa tolǵanǵa deıin onyń kútimine baılanysty tólenetin járdemaqy aı saıyn kelesideı mólsherde tólenedi:
- birinshi balaǵa – 5,76 AEK nemese 24 912 teńge;
- ekinshi balaǵa – 6,81 AEK nemese 29 454 teńge;
- úshinshi balaǵa – 7,85 AEK nemese 33 952 teńge;
- tórtinshi jáne odan keıingi balalarǵa – 8,90 AEK nemese 38 493 teńge.
Budan basqa jumys isteıtin azamattarǵa júktilikke jáne bosanýǵa, jańa týǵan balany (balalardy) asyrap alýǵa baılanysty kirisinen aıyrylǵan jaǵdaıda MÁSQ-tan tólenetin áleýmettik tólem júktiligi jáne bosanýy boıynsha berilgen demalystyń barlyq kúnderine taǵaıyndalady. Tólem mólsheri júktiligi jáne bosanýy boıynsha ýaqytsha eńbekke jaramsyzdyq paraǵy berilgenge deıingi sońǵy 12 aı ishinde MÁSQ-ǵa áleýmettik aýdarymdar júrgizilgen ortasha aılyq kiriske jáne eńbekke jaramsyzdyq kúnderiniń sanyna baılanysty bolady.
Atalǵan birjolǵy tólemdi jyl basynan beri jalpy somasy 29,7 mlrd teńgege 30,8 myń adam aldy, onyń ishinde aqpan aıynda 12,9 mlrd teńge somasyna 13,8 myń adam aldy. Esepti kezeńde taǵaıyndalǵan tólemniń ortasha mólsheri 1 158 107 teńgeni qurady.
8 naýryz qarsańynda kópbalaly analarǵa beriletin járdemaqy mólsheri qandaı?
Sondaı-aq MÁSQ-dan bala bir jarym jasqa tolǵanǵa deıin onyń kútimine baılanysty kirisinen aıyrylý jaǵdaıy boıynsha aı saıynǵy áleýmettik tólem mindetti áleýmettik saqtandyrý júıesine qatysýshyǵa balanyń týǵan kúninen bastap taǵaıyndalady. Tólemniń mólsheri sońǵy 2 jylda MÁSQ-ǵa áleýmettik aýdarymdar júrgizilgen ortasha aılyq kiristiń 40%-n quraıdy. Eki jáne odan da kóp bala týǵan jaǵdaıda tólem ár balaǵa jeke taǵaıyndalady.
Bala kútimine baılanysty járdemaqy: Qańtar aıynda qansha teńge tólendi?
2026 jyldyń 2 aıynda bul tólem 385,9 myń adamǵa taǵaıyndaldy, jalpy tólemniń somasy 64,1 mlrd teńgeni qurady. Onyń ishinde tólem aqpan aıynda 14 myń alýshyǵa taǵaıyndaldy, tólemniń somasy aqpan aıynda 2,4 mlrd teńgeni qurady. Esepti kezeńde tólemniń aı saıynǵy ortasha mólsheri – 78 394 teńge.
