Aýyl sharýashylyǵy ónimderin óndirý kóleminiń artýy, zamanaýı agrotehnologııalardyń engizilýi jáne salany júıeli memlekettik qoldaý eksport kólemin keńeıtýge jáne jańa naryqtardy ıgerýge múmkindik berip otyr.
Kóktemgi egis jáne egin jınaý jumystaryn memlekettik qoldaý, qolaıly aýa raıy jaǵdaılary jáne zamanaýı tehnologııalardy qoldanýdyń arqasynda Qazaqstan eki jyl qatarynan rekordtyq astyq ónimin jınady.
Aýyl sharýashylyǵy mınıstrliginiń málimetinshe, byltyr ortasha ónimdilik gektaryna 16,3 sentnerdi quraǵan jaǵdaıda 25,9 mıllıon tonna astyq jınaldy, onyń 19,3 mıllıon tonnasy bıdaı.
О́ndiris kóleminiń ósýi eksport kóleminiń artýymen qatar júrip keledi.
«2024-2025 saýda maýsymynyń qorytyndysyna súıensek, astyq pen unnyń astyq balamasyndaǵy eksporty 15,3 mıllıon tonnany qurap, aldyńǵy jylmen salystyrǵanda 60 paıyzǵa artty.
Bıylǵy saýda jylynda jańa ónim astyǵyn jetkizý kólemi 8,5 mıllıon tonnaǵa jetti, bul 2024 jyldyń osy kezeńindegi kórsetkishten 14 paıyzǵa joǵary», delingen habarlamada.
Qazaqstan astyǵy qashanda Ortalyq Azııa elderi – О́zbekstan, Tájikstan, Qyrǵyzstan jáne Aýǵanstan naryqtarynda joǵary suranysqa ıe.
Sonymen qatar elimiz eksport geografııasyn da keńeıtip keledi. Máselen, astyq Vetnamǵa, Birikken Arab Ámirlikterine, Soltústik Afrıka elderine eksporttalyp, Iranǵa, Ázerbaıjanǵa jáne Grýzııaǵa jetkizilimder qaıta jandandy.
Eýropa naryqtaryna negizinen Durum jáne Hi-Pro surypty joǵary sapaly bıdaı eksporttalady.
Byltyr Qytaıǵa mal azyqtyq un jetkizý kólemi 2,9 mıllıon tonnany qurap, 2023 jylmen salystyrǵanda 2,4 ese artty.
2024 jyly Qazaqstan bıdaı eksporty boıynsha álemde 10-oryn, al arpa eksporty boıynsha 9-oryn ıelendi.
Astyqpen qatar elimiz álemdik un naryǵynda jetekshi oryndaryn saqtap keledi. О́ndiris kólemi 3 mıllıon tonnadan asady, al eksport kólemi 1,8 mıllıon tonnaǵa jetip, 2024 jylmen salystyrǵanda 1,2 paıyzǵa ósti.
Unnyń negizgi ótkizý naryqtary – Ortalyq Azııa elderi, Aýǵanstan, Reseı jáne Qytaı.
Memleket eksporttyq bastamalardy qoldaýǵa aıryqsha nazar aýdarady.
Astyqty syrtqa tasymaldaý shyǵyndaryn óteý tetiginiń merzimi 2026 jylǵy 1 qyrkúıekke deıin uzartyldy. Bul jetkizilim kóleminiń qarqynyn saqtaýǵa jáne otandyq ónimniń halyqaralyq naryqtaǵy ornyn nyǵaıtýǵa múmkindik beredi.
Aýyl sharýashylyǵy ónimin qaıta óńdeý úlesi jyl sońyna deıin 70%-ǵa jetedi
Búgingi tańda Qazaqstannyń aýyl sharýashylyǵy ónimderi álemniń 72-den astam eline jetkiziledi. Eksporttyń negizgi baǵyttary – Ortalyq Azııa elderi, Eýrazııalyq ekonomıkalyq odaq elderi, Eýropa odaǵy elderi, Aýǵanstan, Túrkııa jáne Qytaı.
Sońǵy bes jylda agroónerkásip kesheni ónimderiniń eksporty 1,8 ese ósip, 3,8 mıllıardtan 7 mıllıard AQSh dollaryna jetti. О́tken jyly eksport kólemi 36,9 paıyzǵa ósip, 7 mıllıard AQSh dollaryn qurady. Agroónerkásip kesheni eksportynyń jalpy kóleminde óńdelgen ónimniń úlesi 51,4 paıyzǵa jetti.
Aıta keteıik, buǵan deıin sońǵy 7 jylda Qazaqstandaǵy aýyl sharýashylyǵy óniminiń jalpy kólemi eki esege jýyq ósip, 2019 jylǵy 5,2 trln teńgeden 2025 jyly 9,8 trln teńgege jetkenin habarlaǵan edik.
