Áli kúnge Qazaqstannyń keıbir eldi mekenderiniń turǵyndary ýaqytyly sapaly ári tegin medısınalyq kómekke qol jetkize almaı keledi. Osy olqylyqtyń ornyn toltyrý úshin «Samuryq-Qazyna» UÁQ» AQ kómegimen «Samruk-Kazyna Trust» Áleýmettik jobalardy damytý qory, Densaýlyq saqtaý mınıstrligi jáne «Qazaqstan temir joly» janyndaǵy «Áleýmettik jobalar qory» birlesip «Medısınalyq poıyzdar» jobasyn júzege asyryp keledi. 2010 jyldan beri jalǵasyp kele jatqan jobaǵa «Densaýlyq» jáne «Salamatty Qazaqstan» syndy eki Densaýlyq poıyzy tartylǵan.
Poıyz turǵyndarǵa sapaly ári jedel dıagnostıka jasaýǵa múmkindik beretin zamanaýı medısınalyq quraldarmen jabdyqtalǵan. Dárigerler jalpy jáne bıohımııalyq analızder, rentgenografııa men flıýrografııany, ishki aǵzalar men tamyrlardy ÝDZ-zertteýlerin, elektrokardıogrammany, gastrofıbroskopııany jáne dıagnostıkalyq zertteýlerdiń basqa da túrlerin jasaıdy. Jumys tobynyń quramynda oftalmolog, otolarıngolog, nevropatolog, hırýrg, akýsher-gınekolog, kardıolog, stomatolog, jalpy tájirıbe dárigeri, keýde mamany, pedıatr jáne t.b. sııaqty beıindi mamandardyń barlyǵy bar. Olar dıagnostıkalyq emsharadan bólek shaǵyn hırýrgııalyq operasııalar da jasaıdy.
– Densaýlyq saqtaý mınıstrligi shalǵaıdaǵy eldi mekenderdiń turǵyndaryna medısınalyq kómek kórsetý úshin jyljymaly medısınalyq keshendermen jáne medısınalyq poıyzdarmen qamtamasyz etip keledi. Byltyr mamandarymyz 127 eldi mekendi aralap, 40 myńǵa jýyq adamǵa kómek kórsetken bolatyn. Emdelýshilerdiń arasynan qan aınalymy júıesi, onkologııalyq jáne basqa da sozylmaly aýrýlar erte kezeńderde anyqtaldy. Bıyl mamandar quramyna S.J.Asfendııarov atyndaǵy Qazaq ulttyq medısına ýnıversıtetiniń professorlary qosylyp otyr, – dedi Densaýlyq saqtaý mınıstrligi Medısınalyq kómekti uıymdastyrý departamentiniń dırektory Asqar Horoshash.
Uıymdastyrýshylar bıyl 60 myńǵa jýyq adamǵa medısınalyq kómek kórsetýdi josparlap otyr. Poıyzdyń júretin jolynyń kestesi medpoezd.kz jáne sk-trust.kz saıttaryna jarııalanǵan.
– Bıyl biz baratyn oblystardyń sanyn kóbeıttik. Poıyz 14 oblysty aralaý úshin 21 jeltoqsanǵa deıin jolda bolady. Keste boıynsha birinshi Almaty oblysynyń turǵyndaryna tegin medısınalyq kómek kórsetiledi. Osy óńirden soń poıyz Shyǵys Qazaqstan, Soltústik Qazaqstan jáne Aqmola oblystaryna baǵyt alady. Odan ári «Densaýlyq» poıyzynyń batys óńirlerge alǵan baǵyty ońtústikke jalǵasady da, Jambyl oblysynda óz baǵdaryn aıaqtaıdy. Jalpy alǵanda poıyz 195 beketke toqtap, 19 myń shaqyrymdy júrip ótýge tıis, – deıdi «Samruk-Kazyna Trust» Qorynyń Bas dırektory.
Maıgúl SULTAN,
«Egemen Qazaqstan»
