Memleket basshysy jıynǵa qatysýshylar aldynda sóılegen sózinde búgingi merekeniń elimizdegi barlyq halyq pen ult ókilderin biriktiretinin aıtty.
– Elbasy Qazaqstan halqy Assambleıasynda sóılegen sózinde Qazaqstandaǵy ultaralyq kelisimniń mańyzy zor ekenin atap ótti. Nursultan Nazarbaevtyń qajyrly eńbeginiń arqasynda Qazaqstan búginde kóptegen ult ókilderiniń kıeli shańyraǵyna aınaldy, – dedi Qasym-Jomart Toqaev.
Qazaqstan Prezıdenti kóp etnosty, kóp konfessııaly elimizdiń keleshegi týraly túrli teris boljamdar aıtylǵanyna qaramastan, Elbasynyń ortaq Otanymyzda beıbitshilik pen kelisimdi saqtaı bilgenin aıtty.
Memleket basshysy Almatynyń Qazaqstan tarıhyndaǵy mańyzdy róline nazar aýdaryp, osy qalada memleketimizdiń táýelsizdigi jarııalanǵanyna toqtaldy.
– Almaty árqashan óziniń ásemdigimen erekshelenedi. Almatylyq – qaıtalanbas brend ári shynaıy ınternasıonalızmniń jarqyn úlgisi. Búginde qala elimizdiń iskerlik, qarjy, mádenı, oqý-aǵartý jáne týrıstik ortalyǵy. Sondaı-aq, Almaty – jańa jumys oryndaryn ashyp, qala bıýdjetiniń kirisin arttyrýǵa úles qosyp otyrǵan shaǵyn jáne orta bıznestiń tartylys ortalyǵy, – dedi Qazaqstan Prezıdenti.
Qasym-Jomart Toqaev halyqtyń ómir súrý sapasy men ál-aýqatyn arttyrý máselesine jáne Almaty qalasynyń áleýmettik-ekonomıkalyq damý perspektıvalaryna toqtaldy.
– Biz ekologııa men aýa sapasy, ınfraqurylym jáne qoǵamdyq qaýipsizdik máselelerin birlese sheshýimiz qajet. Qalamyz turǵyndar men sheteldik qonaqtar úshin jaılyǵy turǵysynan úlgi bolýy kerek. Avtokólikter men energııamen qamtamasyz etý salalarynda ekologııalyq taza tehnologııalarǵa ótetin ýaqyt jetti, – dedi Memleket basshysy.
Qazaqstan Prezıdenti ártúrli etnıkalyq top ókilderińniń ózara syılastyǵynyń, aýyzbirshiligi men jasampaz eńbeginiń arqasynda Táýelsizdigimizdi nyǵaıtyp, ekonomıkada tabystarǵa jetkenimizdi atap ótti.
– Búginde árbir qazaqstandyq qaı etnıkalyq topqa jatatyna qaramastan ózderin birtutas úlken otbasynyń múshesi sezinedi. Birlik pen kelisim – halqymyzdyń qıyn-qystaý jyldarda da saqtaı bilgen qundylyqtary. «Áralýandyqtan birlikke» – bizdiń saıasatymyzdyń máni. Bárimiz birge ózimizdiń eńbeksúıgishtigimizben, tabandylyǵymyzben ǵana qýatty ári damyǵan memleket qura alamyz, – dedi Qasym-Jomart Toqaev.
Memleket basshysy jıynǵa qatysýshylardyń bárin Qazaqstan halqynyń birligi kúnimen quttyqtap, baqyt, amandyq jáne jańa tabystar tiledi.
Saltanatty shara Almaty qalasynyń etnomádenı ortalyqtarynyń beldi ansamblderi men qazaqstandyq estrada ártisteri qatysqan merekelik konsertpen aıaqtaldy.
