Oblystyq Qurylys, sáýlet jáne qala qurylysy basqarmasy basshysynyń mindetin atqarýshy Ádilet Turysbektiń aıtýynsha, 2019 jyly óńirde turǵyn úı qurylysyn salýǵa jáne kommýnıkasııa júrgizýge oblystyq bıýdjetten 29,3 mıllıard teńge qarjy bólinipti. Jalpy, 70 kóppáterli, 54 bir qabatty jáne turǵyndardyń óz qarajatyna 5000 jeke úı turǵyzý josparlanǵan eken. «Jyldyń sońyna deıin «7-20-25» baǵdarlamasy boıynsha 1120 páter salynyp bitedi. Qazir alty úıdiń qurylysy bitip tur. Biraq oǵan áli turǵyndar qonystanǵan joq. 20 sáýirdegi málimetterge qaraǵanda, bankten ıpoteka alýǵa 547 azamattan ótinish túsken, onyń ishinde 337-siniń ótinishi maquldanǵan», deıdi Á.Turysbek.
Daıyn úılerge turǵyndardyń qonystanbaýynyń bir sebebi – óńirdegi nesıe berýshi bankterdiń oblysta salynyp jatqan baspanalardan habarsyzdyǵy. Qurylysy byltyr aıaqtalsa da, turǵyndar áli kire almaı áýre-sarsańǵa túsip júrgen úılerdiń máselesi – óz aldyna bólek áńgime. Qurylys basqarmasy jańa úılerge azamattardy qonystandyrý kestesin eki aıǵa deıin keshiktirip keledi. Jaqynda oblys ákimdiginde ótken jıynda aımaq basshysy Danıal Ahmetov basqarma jumysyn qatty synǵa aldy. «Jýyqta bank basshylaryn shaqyryp, osy máseleni talqylaǵanymyzda nesıe berýshi uıymdardyń salynyp jatqan qurylystan múlde habarsyz ekendigi belgili boldy. Úılerdiń qaıda, qansha kólemde salynyp jatqany, sıpaty qandaı - esh maǵlumattary joq. Aımaqta turǵyzylyp jatqan nysandar týraly tolyq aqparat berińizder», dep tapsyrdy oblys ákimi basqarma basshysynyń mindetin atqarýshy men óziniń orynbasary Baqytjan Baıahmetovke.
О́SKEMEN
