Tuńǵysh Prezıdent – Elbasy Nursultan Nazarbaevtyń «Uly dalanyń jeti qyry» atty maqalasy qozǵaý salǵan osy bastamanyń saltanatty tusaýkeser sharasyna Batys Qazaqstan oblysy ákiminiń orynbasary Mırjan Satqanov, Aqjaıyq aýdanynyń ákimi Qalııar Aıtmuhambetov arnaıy qatysty.
- Qazaq úshin jylqynyń orny erekshe. Tarıhymyzǵa kóz salsaq, babalarymyz osynaý ulanǵaıyr atyrapty at ústinde júrip qorǵap qalǵan. Búgingi býyn babadan qalǵan muraǵa adaldyq tanytyp, atqa miný mádenıetin úırenip jatqany qýantady. Jastar jylynda balaýsa tolqyndy tálim-tárbıege baýlyp jatqan aqjaıyqtyqtardyń bul bastamasy kópke úlgi. «Quleger» at sporty kesheni – oblysymyzdaǵy osyndaı besinshi at sporty mektebi. Aýdannnyń basqa da okrýgterinde at sporty úıirmelerin ashý qolǵa alynyp jatyr eken. Erjúrek te eljandy urpaq tárbıeleýdegi bastamalaryńyz baıandy bolsyn, - dedi Mırjan Munaıdaruly.
Jańa keshende urpaq sanasyna ulttyq qundylyqtar sińirilip, atadan balaǵa mıras bolǵan kókpar, qyz qýý, teńge ilý, aýdaryspaq syndy halyqtyq oıyndardy damytý qolǵa alynbaq.
- Bizge qazirdiń ózinde 30-ǵa tarta balǵyn sportshy tirkeldi. Olarǵa attarymyz da daıyn. Atqoramyzda 5 báıge aty, kókparǵa arnalǵan 20 at, serýendeýge arnalǵan 5 qylquıryq bar. Bilikti eki bapkerimiz de saqadaı saı. Biraz jyl buryn qurylǵan «Qulager» kókpar komandasy talaı jerde olja salyp júr. Sol shabandozdardyń izin basatyn jas sportshylardy daıyndamaqpyz. Báıgege qosatyn shabandozdarymyz bir tóbe. Sonymen qatar keshende sal aýrýyna shaldyqqan balalarǵa arnalǵan atpen serýendeý - ıppoterapııa úıirmesi qyzmet kórsetedi. Bul jerge kez kelgen adam kelip, aqy tólep atpen serýendeýine de bolady. Keshen demalyssyz jumys isteıdi, - deıdi keshenniń atqarýshy dırektory Nuraly Kenjemurat.
Keshenniń ashylý qurmetine oraı uıymdastyrylǵan «Uly dala oıyndary» oblystyq ashyq týrnıri joǵary deńgeıde ótti. Kókpar, taı jarys, qunan jarys, aýdaryspaq, teńge ilýden bolǵan básekeler tartysty boldy. Bolat Atkeevke Aqjaıyq aýdany ákiminiń alǵys haty tabystaldy.
